МАРОЗНА, З ПРАЯСЬНЕНЬНЯМІ...
Уначы −11 — −17 °С, удзень −9 — −15 °С.
У БЕЛАРУСІ І СЬВЕЦЕ:
У Брусэлі адбудзецца саміт Эўразьвяз — Расея.
Мітрапаліт Тадэвуш Кандрусевіч сустрэнецца з журналістамі і супрацоўнікамі каталіцкіх СМІ ў менскім касьцёле сьвятых Сымона і Алены. Пачатак аб 11.00.
Вольга Гапеева прэзэнтуе сваю новую кніжку «Прысак і Пожня» (Менск, Цэнтар швэдзкіх дасьледаваньняў, вул. Інтэрнацыянальная, 11а, офіс 27). Пачатак а 18.00.
Канцэрт «Колазварот» у выкананьні ансамблю салістаў «Класік-авангард» (Менск, малая заля імя Р. Шырмы Белдзяржфільгармоніі). Пачатак а 19.00.
Канцэрт гурту Marilyn Manson у менскім Палацы спорту. Пачатак а 20.00.
ЁСЬЦЬ НАГОДА:
Дзень сьвятога Томаса ў Нідэрляндах. У найкарацейшы дзень году нідэрляндзкія вучні стараюцца прыйсьці ў школу як мага раней. Таго, хто прыйдзе апошнім, сябры з клясы ўвесь дзень дражняць «сонным Томасам».
ТАКСАМА Ў ГЭТЫ ДЗЕНЬ:
1846 — шатляндзкі хірург Робэрт Лістан правёў першую ў Эўропе апэрацыю з анэстэзіяй.
1898 — П’ер і Мар’я Кюры адкрылі радыюм.
1913 — у нью-ёрскай газэце надрукавалі першую ў гісторыі крыжаванку.
1918 — на загад Рады дзяржаўнай абароны Літвы быў утвораны Першы гарадзенскі беларускі полк.
1958 — Шарля дэ Голя абралі прэзыдэнтам Францускай Рэспублікі.
1991 — была падпісаная Алма-Ацінская дэклярацыя, якая абвясьціла аб стварэньні Судружнасьці Незалежных Дзяржаваў.
2007 — да Шэнгенскага пагадненьня далучылася 9 краінаў Эўразьвязу — Літва, Латвія, Эстонія, Польшча, Чэхія, Славаччына, Славенія, Вугоршчына і Мальта.
У гэты дзень нарадзіліся:
1796 — Тамаш Зан, паэт, удзельнік вызвольнага руху, сябра Таварыства філяматаў.
1879 — Ёсіф Сталін, савецкі палітык, дыктатар.
1890 — Мікалай Аладаў, кампазытар, пэдагог, адзін з арганізатараў і першых выкладчыкаў Беларускай кансэрваторыі і Беларускага музычнага тэхнікуму.
1917 — Гайнрых Бёль, нямецкі пісьменьнік, ляўрэат Нобэлеўскай прэміі ў галіне літаратуры 1972 году.
1934 — Іван Чыгрынаў, беларускі празаік, драматург, перакладчык, публіцыст. У 1994-м Чыгрынаву была нададзеная годнасьць народнага пісьменьніка Беларусі.
1967 — Міхаіл Саакашвілі, прэзыдэнт Грузіі з 2003 году.
1971 — Аляксандар Памідораў, беларускі музыка, тэле- і радыёвядоўца, шоўмэн.
У гэты дзень памерлі:
1375 — Джаваньні Бакачча, італьянскі пісьменьнік, аўтар «Дэкамэрону».
1940 — Фрэнсіс Скот Фіцджэралд, амэрыканскі пісьменьнік.
1981 — Міхась Забэйда-Суміцкі, беларускі сьпявак, пэдагог.
1989 — Сэм’юэл Бэкет, ірляндзкі пісьменьнік, адзін з заснавальнікаў тэатру абсурду, ляўрэат Нобэлеўскай прэміі 1969 году.
2006 — Сапармурат Ніязаў, першы прэзыдэнт Туркмэністану.
ГОД ТАМУ Ў ЗАГАЛОЎКАХ НА САЙЦЕ «СВАБОДЫ»:
Марына Адамовіч пабралася са Статкевічам
Ганна Гуцал: «Будзем патрабаваць увесьці войскі ў Беларусь»
Жалобная працэсія з труной Вацлава Гаўла
ЦЫТАТА НА ПАМЯЦЬ:
Можна й пачакаць, калі ёсьць чаго чакаць.
Сэм’юэл Бэкет
