Лінкі ўнівэрсальнага доступу

Аляксей Кароль: Па ўсіх стандартах рэжым у Расеі аўтарытарны


Уладзімер Пуцін 20 сьнежня правёў восьмую прэсавую канфэрэнцыю на пасадзе прэзыдэнта Расеі.


Сярод іншага, ён выступіў з падтрымкай ухваленага ўчора Дзярждумай «анты-магніцкага закону», а таксама выказаў сваю нязгоду з заявамі аб тым, што ён стварыў у Расеі аўтарытарны рэжым.

Прэсавая канфэрэнцыя Уладзімера Пуціна доўжылася 4 з паловай гадзіны. Беларусь за гэты час прэзыдэнт Расеі ўскосна згадаў толькі 1 раз, калі гаварыў пра эфэктыўнасьць працы Мытнага саюзу. Пуцін, у прыватнасьці заявіў, што рост таваразвароту з краінамі Мытнага саюзу склаў 10 працэнтаў, і што тут добрая структура ў гандлі — 20 працэнтаў складаюць машыны і абсталяваньне, а зь іншымі краінамі — толькі каля 2 працэнтаў.

Некалькі разоў цягам канфэрэнцыі журналісты задавалі Пуціну пытаньні пра справу загінулага ў турме расейскага юрыста Магніцкага, амэрыканскі акт ягонага імя, які ўводзіць санкцыі да расейскіх чыноўнікаў, вінаватых у ягонай сьмерці і ў парушэньні правоў чалавека, а таксама пра «антымагніцкі закон», ухвалены ўчора Дзярждумай, які забараняе амэрыканцам ўсынаўляць расейскіх сірот. Пуцін адказаў, што цалкам падтрымаў Дзярждуму:

«Пытаньне зусім не ў Магніцкім, а ў тым, што амэрыканскія заканадаўцы, пазбавіўшыся ад аднаго антырасейскага і антысавецкага акту Джэксана-Вэніка, палічылі неабходным прыняць тут жа другі антырасейскі акт. Мы ўспрынялі гэта так, што амэрыканскі заканадаўца вырашыў нам паказаць, хто тут гаспадар. Не было б Магніцкага, знайшлі б іншую нагоду».

Аляксандар Класкоўскі
Аляксандар Класкоўскі
Палітоляг Аляксандар Класкоўскі мяркуе, што Пуцін тут дэманструе паказную цьвёрдасьць:

«Гэта пункцік усіх аўтарытарных рэжымаў, што ніхто не зможа нас нахіліць, калі казаць словамі Лукашэнкі. Такі адказ Амэрыцы — гэта, хутчэй, такі рытуальны піяраўскі крок».

Насамрэч, Расея не зацікаўленая ў пагаршэньні адносінаў з ЗША, у яе ёсьць іншыя задачы, мяркуе спадар Класкоўскі. Абвастрэньня адносін з ЗША ў Масквы ня будзе:

«І калі ў Менску спадзяюцца, што пачнецца новая халодная вайна і на гэтым можна будзе пагрэць рукі, то дарэмна».

Аляксей Кароль
Аляксей Кароль
Палітоляг Аляксей Кароль назваў прыкрым, што Масква адказвае на закон Магніцкага, спэкулюючы лёсамі дзяцей-сірот. Такі адказ найперш б’е па рэпутацыі Расеі і яе дачыненьнях з ЗША:

«Расейска-амэрыканскія адносіны на гэтым этапе пагоршацца. За гэтым я яшчэ бачу і праяву імпэрскай тэндэнцыі ў Расеі, што яна мусіць адказаць моцна, як вялікая дзяржава».

Уладзімер Пуцін таксама выказаў нязгоду з заявай, што ён стварыў у Расеі аўтарытарны рэжым:

Журналіст: «За 12 гадоў вы пабудавалі даволі жорсткі і дзесьці нават аўтарытарны рэжым асабістай улады. Думаеце гэтая сыстэма жыцяздольная ў новым стагодзьдзі?

Пуцін: «Лічу, што мы забясьпечылі стабільнасьць выключна як абавязковую ўмову для разьвіцьця. Але назваць гэтую сыстэму аўтарытарнай не магу. І самым яркім доказам гэтаму маё рашэньне пайсьці на другія пазыцыі пасьля двух тэрмінаў прэзыдэнцтва».
Па ўсіх стандартах рэжым у Расеі аўтарытарны з імпэрскай падкладкай

Палітоляг Аляксей Кароль у сувязі з гэтым згадвае, што і ў СССР называлі сябе дэмакратычнай дзяржавай:

«На справе ў Пуціна сапраўды ёсьць памкненьне, у многім рэалізаванае, —стварыць аўтарытарны рэжым. Аб гэтым сьведчаць усе апошнія дзеяньні: разгон акцый, арышты і суды за тыя дзеяньні, якія ва ўсім сьвеце дазваляюцца. Па ўсіх стандартах рэжым у Расеі аўтарытарны з імпэрскай падкладкай».

Палітоляг Аляксандар Класкоўскі мяркуе, што пуцінскі рэжым праходзіць такую ж эвалюцыю, як і беларускі рэжым:

«Пасьля таго як Пуцін пераабраўся, ён таксама пачаў мэтадычна зачышчаць палітычнае поле: узьнікла справа аб беспарадках, ідзе пэрсанальны ціск на лідараў пратэсту, супраць іх заводзяць крымінальныя справы, ператрусы. Усё гэта вельмі нагадвае беларускія рэаліі».
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG