Лінкі ўнівэрсальнага доступу

Прадстаўнікі Міністэрства культуры і Генпракуратуры выяжджалі на месца будаўніцтва забаўляльнага комплексу ў Курапатах і выявілі парушэньні.

Пра гэта паведамляе Эўрарадыё.

Адказ на заяву ўдзельнікаў круглага стала «Абаронім Курапаты» пра недапушчальнасьць будаўніцтва «Бульбашъ-холу» каля крыжоў ва ўрочышчы Курапаты атрымала арганізатарка мерапрыемства Ганна Шапуцька. У адказе за подпісам намесьніка міністра культуры Віктара Кураша паведамляецца:

«Падчас выезду на месца выяўлена, што работы праводзяцца часткова ў ахоўнай зоне гісторыка-культурнай каштоўнасьці. Пры гэтым іх выкананьне ажыцьцяўляецца без дазволу Міністэрства культуры […]. Міністэрствам культуры выдадзена прадпісаньне заказчыку работ СТОО «Белрэстінвэст» і Менаблвыканкаму аб спыненьні работ у зоне аховы гісторыка-культурнай каштоўнасьці […]. Аднаўленьне работ будзе магчыма пасьля забесьпячэньня адпаведнасьці праектнай дакумэнтацыі і яе рэалізуючым прававым нормам».

Тым часам, у адказе – ні слова пра прыпыненьне прац на самім будынку «Бульбашъ-холу», толькі пра ахоўную зону Курапатаў. Бо некалі дазвол на пабудову «Бульбашъ-холу» давала само ж Міністэрства культуры.

Ганна Шапуцька ў інтэрвію Эўрарадыё адзначыла, што падпісанты звароту, сярод якіх былі такія людзі як Ігар Кузьняцоў, Сяргей Ханжанкоў, Зьміцер Дрозд ды іншыя, таксама прасілі Мінкульт пра асабістую сустрэчу. Гэтую просьбу чыноўнікі праігнаравалі.

Паказаць камэнтары

XS
SM
MD
LG