Лінкі ўнівэрсальнага доступу

Партыя левых «Справядлівы сьвет» адмовілася падпісваць Мэмарандум аб абароне незалежнасьці Рэспублікі Беларусь, прапанаваны Радай БНР. Чаму такія розныя сілы, як партыя левых і грамадзянская кампанія «Эўрапейская Беларусь», адмовіліся падпісаць гэты дакумэнт? Як можна ацаніць эфэктыўнасьць і значэньне мэмарандуму? На гэтыя пытаньні адказвае галоўны рэдактар газэты «Новы час» Аляксей Кароль.

— Па якіх сапраўдных прычынах гэтыя дзьве апазыцыйныя сілы адмовіліся падпісваць мэмарандум?

— Пачнём з партыі «Справядлівы сьвет», якая яшчэ нядаўна называлася камуністычнай. Цяперашняя заява, па сутнасьці, у традыцыі многіх папярэдніх іхніх заяваў — яна ня раз выказвалі сваё прыхільнае стаўленьне да Расеі. І тут адбываецца блытаніна — калі блытаюць палітыку рэжыму з краінай, народам. Я маю на ўвазе, што ў мэмарандуме няма ніякіх антырасейскіх тэзаў, тэзаў супраць рускага народу.

Таму цяперашняя заява «Справядлівага сьвету» — гэта даніна іхняй традыцыйнай канцэпцыі. Але такім чынам яны ўнесьлі свой каменьчык разладу ў магчымасьці кансалідацыі антырэжымных сілаў у Беларусі.

— Я матывы «Эўрапейскай Беларусі»?

— Тое, што публічна агучыў Саньнікаў, можна ня браць пад увагу — гэта «ўпакоўка». Я думаю, што «Эўрапейская Беларусь» даўно мае прэтэнзію быць самастойнай сілай з прыцэлам на стварэньне нейкага аб’яднаньня пад сваёй эгідай. Што таксама зараз не на карысьць асэнсаванай неабходнасьці кансалідацыі дэмакратычных сілаў.

— Тым ня менш, пераважная большасьць астатніх апазыцыйных палітычных сілаў падпісалі гэты мэмарандум. Як у цэлым можна ацаніць гэты дакумэнт і ягоны эфэкт на гэты момант?

— Мэмарандум, безумоўна, ужо мае пазытыўны эфэкт, бо гэта ўпершыню за доўгі час асэнсаваная заява аб кансалідацыі на пэўных прынцыпах. І хаця гэтая заява аб намерах, яна дадае ўпэўненасьці, што беларуская дэмакратычная апазыцыя ўрэшце аб’яднаецца. Гэта, па сутнасьці, умова яе выжываньня і перамогі ў будучым.
  • 16x9 Image

    Віталь Цыганкоў

    Віталь Цыганкоў скончыў факультэт журналістыкі БДУ. Адзін з двух заснавальнікаў першага недзяржаўнага агенцтва навінаў БелаПАН. Працаваў ў газэтах «Звязда», быў карэспандэнтам у Беларусі расейскай «Независимой газеты», Associated Рress, аглядальнікам у газэце «Свабода».  На беларускай Свабодзе ад 1994 году. Карэспандэнт расейскай Свабоды ў Беларусі.
     

Паказаць камэнтары

XS
SM
MD
LG