Лінкі ўнівэрсальнага доступу

Невядомыя праніклі ў электронную пошту і скайп журналісткі Ірыны Халіп


Ірына Халіп

Ірына Халіп

Ірына Халіп паведаміла пра пранікненьне ў яе электронны акаўнт, разьмешчаны на Google. 22 лістапада журналістка атрымала пра гэта паведамленьне ад службы сэрвісу Google. Сёньня, 23 лістапада, паводле Ірыны Халіп, на яе адбылася новая атака — гэтым разам невядомыя праніклі ў яе скайп і зьмянілі там пароль. Ірына Халіп мяркуе, што гэта працуюць беларускія спэцслужбы.

«З маім мужам Андрэем мы кантактуем штодня і толькі праз скайп. Відаць, спэцслужбы імкнуцца кантраляваць яго і вырашылі скарыстаць гэты сродак сувязі», — мяркуе Ірына Халіп.

Муж Ірыны Халіп, былы кандыдат на прэзыдэнта Андрэй Саньнікаў, атрымаў палітычны прытулак у Вялікабрытаніі. У 2011 годзе Андрэй Саньнікаў быў асуджаны за Плошчу на 5 гадоў зьняволеньня. Сёлета ўвесну ён быў вызвалены паводле памілаваньня Аляксандрам Лукашэнкам.

Ірыну Халіп асудзілі за падзеі 19 сьнежня 2010 году на 2 гады зьняволеньня з адтэрміноўкай на 2 гады. Журналістка мусіць бязвыезна жыць у Менску пад наглядам міліцыі. Раней Ірына Халіп распавядала пра розныя праблемы, якія ўзьнікалі ў яе са сродкамі сувязі. У прыватнасьці, на мабільны тэлефон журналісткі бесьперапынна прыходзілі званкі, з-за чаго карыстацца тэлефонам было працяглы час немагчыма.

На момант публікацыі сувязь праз скайп Ірына Халіп не аднавіла.
XS
SM
MD
LG