Лінкі ўнівэрсальнага доступу

Дэпутаты Палаты прадстаўнікоў пра выбары ў ЗША


Выбары прэзыдэнта Злучаных Штатаў Амэрыкі без перабольшваньня можна назваць найважнейшай падзеяй бліжэйшага часу. Асабліва ў сытуацыі, калі рэйтынгі абодвух прэтэндэнтаў практычна зраўняліся. З гэтай нагоды наш карэспандэнт зьвярнуўся да некалькіх дэпутатаў Палаты прадстаўнікоў з пытаньнямі: «Ці лічыце вы сыстэму амэрыканскіх выбараў справядлівай? І за каго б вы асабіста прагаласавалі, калі б удзельнічалі ў выбарах?»

Мікалай Самасейка ў новым складзе Палаты прадстаўнікоў ачольвае камісію па міжнародных справах:

Мікалай Самасейка

Мікалай Самасейка

«Сыстэма амэрыканскіх выбараў не вытрымлівае ніякай крытыкі нават у параўнаньні зь беларускай, якую ўвесь час крытыкуюць. Напрыклад, крытыкуюць датэрміновае галасаваньне ў Беларусі. А ў Амэрыцы яно скрозь. Там нават можна галасаваць па пошце. А хто прыслаў поштай? Хіба гэта можна праверыць?

Там ёсьць шмат нюансаў, якія могуць уплываць на агульныя вынікі выбараў. А што тычыцца міжнародных назіральнікаў, то пагроза ім з боку пракурора Тэхасу больш чым красамоўная».

Спадар Самасейка не сказаў, каму ён больш сымпатызуе на гэтых выбарах:

«Ад адказу на гэта пытаньне я ўстрымаюся. Для таго каб зрабіць правільны выбар, усё ж трэба знаходзіцца ў гэтым грамадзтве, а ня толькі карыстацца інфармацыяй, якая, магчыма, дазаваная і даходзіць да нас ня ў поўным аб’ёме праз мэдыі».

Вадзім Дзевятоўскі

Вадзім Дзевятоўскі

Для прызэра Алімпійскіх гульняў Вадзіма Дзевятоўскага абраньне ў Палату прадстаўнікоў — дэбютнае. Ён намесьнік старшыні камісіі па ахове здароўя, фізычнай культуры і спорту, сямейнай і моладзевай палітыцы:

«Цяжка меркаваць пра такую важную падзею, як выбары, калі ты не жывеш у гэтай краіне. Калі ты ня ведаеш настрою выбарцаў, ня ведаеш дасканала выбарчую сыстэму, наколькі яна аб’ектыўная і справядлівая. Са СМІ, вядома, даходзяць некаторыя выказваньні, думкі. Але я, як чалавек ад спорту, прывык верыць вынікам. Кінуў молат — пабачыў вынік. Іншымі словамі, калі б я быў жыхаром ЗША, то я б мог выказаць свае думкі».

Што тычыцца адказу на другое пытаньне, то зь яго вынікае, што дэпутату Дзевятоўскаму больш сымпатычны цяперашні прэзыдэнт Амэрыкі:

«Я — прыхільнік стабільнасьці. І тут выказваньні на адрас Расеі кандыдата-рэспубліканца Ромні, якія ўсе маглі пачуць, насьцярожваюць. Я за тое, каб быў мір ва ўсім сьвеце. Канфлікт нікому не патрэбны. І таму я аддаў бы перавагу больш-менш стабільным дачыненьням, якія цяпер існуюць паміж ЗША і Расеяй».

Для дэпутаткі Валянціны Лявоненкі цяперашняя кадэнцыя ў Палаце прадстаўнікоў — другая запар. Яна кажа, што ёй бліжэйшая выбарчая сыстэма, пры якой кіраўніка дзяржавы абірае ўвесь народ:
Асоба павінна быць на першым месцы. Тым больш калі гэтая асоба ўвасабляе сабою сымбаль нацыі

«Ужо многія крытыкуюць сыстэму абраньня прэзыдэнта ЗША. Яна не зусім адэкватная тым дэмакратычным нормам, якімі жыве Эўропа. Тут кіраўнікі краін абіраюцца непасрэдна грамадзянамі гэтых краін наўпрост, без усялякіх пасярэднікаў. І мне падаецца, што вось гэтая сыстэма — дэмакратычная і справядлівая, тут кожны грамадзянін ідзе да скрыні і сам аддае голас за таго ці іншага кандыдата. Гэта я лічу найбольш справядлівым».

Спадарыня Лявоненка кажа, што яна б не галасавала ні за Абаму, ні за Ромні:

«Я б абірала іншых прадстаўнікоў, якім я даверыла б кіраўніцтва краінай. Таму што мае каштоўнасныя памкненьні адрозьніваюцца ад поглядаў і аднаго, і другога прэтэндэнта. Я ў прынцыпе лічу, што калі грошы зьяўляюцца меркай чалавечай годнасьці і рэгулятарам грамадзкіх адносін, гэта — няправільна. Асоба павінна быць на першым месцы. Тым больш калі гэтая асоба ўвасабляе сабою сымбаль нацыі».
XS
SM
MD
LG