Лінкі ўнівэрсальнага доступу

Bild: У Нямеччыне адмываюцца і беларускія грошы


Як падае бэрлінскае выданьне Bild са спасылкай на паведамленьне фэдэральнага ведамства па барацьбе з крымінальнай злачыннасьцю (BKA) і фэдэральнай управы кантролю за фінансавымі паслугамі (BaFin), апошнім часам брудныя грашовыя патокі ў Нямеччыну з-за мяжы істотна ўзрасьлі.

У 2011 годзе сьледзтва распачало 13 тысяч спраў па падазрэньні ў адмываньні грошай. У параўнаньні з пазалеташнім пэрыядам колькасьць падобных выпадкаў узрасла на 17%.

Паводле фэдэральных ведамстваў, гэта самы высокі ўзровень за час дзеяньня прынятага ў 1993 годзе Закону аб адмываньні грошай, адзначае ў сваім паведамленьні іншае нямецкае выданьне Die Welt.

На думку вядучага эўрапейскага экспэрта ў гэтым пытаньні Фрыдрыха Шнайдэра з унівэрсытэту ў аўстрыйскім Лінцы, «найбольш крымінальных злачынных грошай паступае ў Нямеччыну з Расеі, Беларусі і Ўкраіны. Калі ж узяць Заходнюю Эўропу, дык тут лідэр — Італія».

У справаздачы, якую BKA і BaFin мяркуюць агучыць у Вісбадэне 29 кастрычніка, адзначаюцца шматлікія выпадкі махлярства, калі прыватныя пэрсоны дзеля адмываньня грошай выкарыстоўваюць банкаўскія рахункі. Таксама адзначаецца, што вельмі часта падобным мэтам служаць рынкі нерухомасьці, рэстаранны бізнэс ды казіно.
XS
SM
MD
LG