Лінкі ўнівэрсальнага доступу

Хлопцы дасьпяваюць хутчэй, чым раней


Сёньня полавае дасьпяваньне амэрыканскіх хлопцаў-падлеткаў пачынаецца ад шасьці месяцаў да двух гадоў раней, чым гэта адбывалася 40 гадоў таму.

Да такой высновы прыйшла Амэрыканская акадэмія пэдыятрыі, правёўшы дасьледаваньне сярод больш чым 4 тысяч хлопцаў ва ўзросьце ад шасьці да 16 гадоў па ўсёй краіне.

Амэрыканскія дасьледаваньні 40-гадовай даўнасьці сьцьвярджалі, што полавае дасьпяваньне (інакш, пубэртатны пэрыяд) у выпадку хлопцаў пачыналася наогул ва ўзросьце 11,5 гадоў.

Найноўшае дасьледаваньне сьцьвярджае таксама, што полавае дасьпяваньне ў чарнаскурых амэрыканскіх падлеткаў пачынаецца раней, чым у белых або лацінаамэрыканцаў. У сярэднім, пубэртатны пэрыяд у чарнаскурых хлопцаў пачынаецца ва ўзросьце 9 гадоў, а ў белых і лацінаамэрыканцаў – ва ўзросьце 10 гадоў. Паводле дасьледнікаў, гэтая розьніца выкліканая генэтычнымі розьніцамі.

Досьлед праводзіўся падчас рутынных мэдычных абсьледаваньняў вучняў у школах. Дактары пры дапамозе інструмэнту, званага архідамэтрам, вымяралі памер яечак. Павялічаньне памеру яечак да 3-4 мілімэтраў лічыцца пачаткам полавага дасьпяваньня.

Досьлед адназначна не ўстанавіў прычыны, чаму полавае дасьпяваньне ў сучасных хлопцаў пачынаецца раней, чым 40 гадоў таму. Сярод магчымых прычынаў называюцца зьмены ў харчаваньні і меншая фізычная нагрузка сучасных падлеткаў.

Амэрыканскія пэдыятры кажуць, што пакуль, без дадатковых досьледаў, немагчыма сказаць нешта аўтарытэтнае пра біялягічныя наступствы ранейшага полавага дасьпяваньня хлопцаў.
XS
SM
MD
LG