Аляксей Кароль: «Гэта рэакцыя на зьмены людзей у іх стаўленьні да ўладаў»
«Думаю, што гэта ёсьць рэакцыя на адчуваньне перамены грамадзкіх настрояў і адносінаў да улады. Ёсьць трывога, што людзі не задаволеныя сваім матэрыяльным станам, што зноў будзе абвал беларускага рубля. Гэта і трывога за сваю будучыню, за свой заўтрашні дзень.
Я думаю, што для Лукашэнкі не засталася таямніцай і сапраўдная яўка на выбарчыя ўчасткі. На ўчорашняй прэсавай канфэрэнцыі ён прызнаўся, што ўжываў адміністратыўны рэсурс, каб загнаць людзей на матч з Гішпаніяй. Мне падаецца, гэта і прызнаньне таго, што адміністратыўны рэсурс ужываўся, каб загнаць людзей да ўрнаў. Але яны не ішлі».
Мацкевіч: «Цяжкасьці заўсёды вымушаюць мабілізаваць піяраўскую актыўнасьць»
«Думаю, гэта найперш зьвязана з тымі цяжкасьцямі, якія чакаюць правячы рэжым пасьля парлямэнцкіх выбараў, гэтай зімою. А цяжкасьці заўсёды вымушаюць мабілізаваць піяраўскую актыўнасьць. Як толькі ў палітыкаў альбо дзяржаўных дзеячаў нешта не выходзіць, ім трэба патлумачыць усім навокал, што так і было задумана, што так і трэба».
