Лінкі ўнівэрсальнага доступу

Чэскія вернікі заступіліся за Зьмітра Дашкевіча


Зьміцер Дашкевіч
Зьміцер Дашкевіч

Чэская харызматычная царква «Křesťanské společenství Praha» накіравала ў Адміністрацыю прэзыдэнта, Пракуратуру і МУС Беларусі лісты ў падтрымку палітвязьня Зьмітра Дашкевiча.

Адмысловая малітва за Зьмітра Дашкевіча ды іншых палітвязьняў адбылася ў Празе ў пятніцу 28 верасьня, паведамляе прэсавая служба БХД.


Палажанка просіць генэральнага пракурора разабрацца

1 кастрычніка нявеста Зьмітра Дашкевіча Наста Палажанка зьвярнулася да генэральнага пракурора Беларусі Аляксандра Канюка з просьбай «правесьці праверку па факце нялюдзкіх адносінаў да Зьмітра Дашкевіча» ў папраўчай калёніі № 20.

Палажанка адзначыла, што бліжэйшым часам Дашкевіч павінен падпісаць скаргу на дзеяньні адміністрацыі калёніі, складзеную з дапамогай адваката. «Аднак у сувязі з тым, што скарга ад імя Дашкевіча паступіць у Генэральную пракуратуру не раней чым праз тыдзень, а яго становішча выклікае заклапочанасьць, я прашу правесьці праверку па факце нялюдзкіх адносін да Дашкевіча, ужыць захады ўрэгуляваньня канфлікту і прыцягнуць вінаватых асоб да адказнасьці», — заявіла Палажанка ў інтэрвію БелаПАН.

Палажанка распавяла, што 26 верасьня разам з адвакатам яна пабывала ў калёніі № 20.

«Начальнік калёніі Юры Збароўскі стаў пераконваць мяне, што Дашкевіч паводзіць сябе неадэкватна, хоча парэзаць сабе вены, абвясьціў галадоўку з-за адсутнасьці адваката, усё адмаўляе і шмат чаго выдумляе. Аднак гэта ня можа адпавядаць рэчаіснасьці, бо ў пэрыяд знаходжаньня ў ВК № 13 у Глыбокім, а таксама ў СІЗА № 2 Віцебску нічога падобнага зь ім не адбывалася. Больш за тое, усяго за тыдзень знаходжаньня ў калёніі № 20 чалавек ня можа карэнным чынам зьмяніць свае паводзіны і ператварыцца ў чалавека зь неўраўнаважанай псыхікай. Лічу, што ўся гэтая размова была спосабам увядзеньня мяне ў зман і спробай аказаць з маёй дапамогай ціск на Дашкевіча», — заявіла Палажанка.


Справа Дашкевіча

19 верасьня Дашкевіча перавялі ў папраўчую калёнію № 20, якая месьціцца ў Мазыры Гомельскай вобласьці.

21-га ён абвясьціў галадоўку ў сувязі зь «нялюдзкімі паводзінамі адміністрацыі калёніі, у тым ліку яе начальніка Юрыя Збароўскага».

28 жніўня 2012 году на закрытым выязным пасяджэньні суд прызнаў Зьмітра Дашкевіча вінаватым у «злосным непадпарадкаваньні патрабаваньням адміністрацыі папраўчай установы» і пакараў яго годам пазбаўленьня волі.

24 сакавіка 2011 году суд асудзіў Дашкевіча на два гады пазбаўленьня волі ў калёніі агульнага рэжыму, а Лобава — на чатыры гады.

Пацярпелых Алега Малышава і Канстанціна Савіцкага, якіх нібыта пабілі Зьміцер Дашкевіч і Эдуард Лобаў, ніхто на працэсе так і ня ўбачыў. Суд ужыў да іх асаблівыя ахоўныя захады, бо яны, маўляў, баяцца помсты родных і паплечнікаў Дашкевіча ды Лобава. Таму свае паказаньні яны давалі з суседняга з судовай заляй пакоя, праз прачыненыя дзьверы. Зьміцер Дашкевіч на судзе заявіў, што бойка, пасьля якой яго арыштавалі, была справакаваная ўладамі, каб нэўтралізаваць яго перад выбарамі.

Міжнародная праваабарончая арганізацыя Amnesty International прызнала лідэра «Маладога фронту» вязьнем сумленьня.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG