Лінкі ўнівэрсальнага доступу

Старшыня камісіі назіральнікам: «У вас не было гэтулькі выбарцаў, а ў нас было»


У Фрунзенскай выбарчай акрузе № 101 Менску апазыцыйныя дэмакратычныя сілы правялі кампанію байкоту выбараў і ўзмоцненага кантролю за галасаваньнем.

Афіцыйна выбары прызналі адбытымі. Незалежныя назіральнікі заяўляюць, што насамрэч прагаласавала ня больш за траціну выбарцаў.

Пра тое, што выбары адбыліся на ўсіх трох участках, старшыні камісіяў абвясьцілі яшчэ а 15.00. Аднак афіцыйныя лічбы тых, хто прагаласаваў, істотна перавышалі падлікі назіральнікаў цягам усяго асноўнага дня — на 300–400 чалавек. Прыкладна тое ж адбывалася і падчас папярэдняга галасаваньня. Паводле незалежных назіральнікаў, у сапраўднасьці ўдзел у галасаваньні па акрузе прыняло ня больш за траціну выбарцаў. Пераважна галасавалі людзі пэнсійнага веку.

Вось жа, кампанія байкоту закранула маладую частку электарату, робіць выснову незалежны назіральнік на ўчастку № 369 Андрэй Солін:

«Мы можам канстатаваць, што падлікі незалежных назіральнікаў і афіцыйныя лічбы выбарчых камісій адрозьніваюцца ўдвая. Цікавае назіраньне, якое я зрабіў, — што моладзь амаль ня ўдзельнічае ў асноўным дні галасаваньня. У асноўным ідуць людзі сталага веку. Можна сказаць, што кампанія байкоту паўплывала на пэўную частку насельніцтва, і даволі ўдала: моладзь у выбарах практычна ня ўдзельнічае».

Назіраньне за ходам галасаваньня і падлік галасоў праходзілі паводле сцэнару ўсіх папярэдніх гадоў: назіральнікі знаходзіліся ад сталоў зь бюлетэнямі на адлегласьці больш за 10 мэтраў. Сябры камісіі галасы выбарцаў лічылі, стаўшы да назіральнікаў сьпінамі, а таму якія бюлетэні і ў чый стос былі пакладзеныя, пракантраляваць было нельга. У выніку з адрывам у 400 галасоў перамог сябра КПБ Аляксей Кузьміч, якога тут называюць праўладным. Пры гэтым мне ня трапіўся ніводзін чалавек, які б галасаваў за гэтую кандыдатуру, а некаторыя выказваліся за байкот нават на выбарчым участку. Гутару зь людзьмі:

Спадар: «Галасаваў я за моладзь. Зараз новы час, новае мысьленьне, таму і людзі ў парлямэнце павінны быць маладыя і новыя».

Спадарыня: «На жаль, не запомніла прозьвішчаў, але галасавала за чалавека, які працуе на ЦЭЦ. Думаю, што той, хто ведае жыцьцё непасрэдна, ведае і што ён будзе рабіць у парлямэнце».

Карэспандэнтка: «Многія людзі расчараваліся ў выбарах, а вы?»

Спадарыня: «Я ня ведаю, але толькі бачу, што вельмі мала людзей на галасаваньні. Вядома, у нас моцны прэзыдэнт, але павінны быць людзі, якія змогуць яму супрацьстаяць».

Карэспандэнтка: «Што вы зрабілі са сваім бюлетэнем?»

Спадар: «Пакінуў сабе на памяць — гэта мой знак пратэсту, мой байкот. Бо ўжо вядома, хто будзе абраны. Я хоць і не празорца, але ўпэўнены на сто адсоткаў, што гэта будзе камуніст Кузьміч. Найдзікунскае фальшаваньне — хадзі, не хадзі — сьпісы ўжо складзеныя, хто трэба, прызначаны — дык які сэнс?»

Цягам усяго дня працу кожнага з трох выбарчых участкаў і ўсіх назіральнікаў кантралявалі супрацоўнікі спэцслужбаў у цывільным. Час ад часу невядомыя спрабавалі ўсчаць спрэчку з назіральнікамі, перашкаджаючы ім сачыць за галасаваньнем. Розьніцу паміж афіцыйнымі лічбамі тых, хто прагаласаваў, і падлікамі назіральнікаў старшыні камісіяў камэнтаваць адмаўляліся. Толькі на ўчастку № 368 старшыня камісіі на запыт назіральнікаў адказаў: «У вас не было гэтулькі выбарцаў, а ў нас было». Калі б галасаваньне праводзілася сумленна, то выбары б праваліліся, упэўнены назіральнік ад руху «За свабоду» Алесь Марчанка:

«Спачатку розьніца ў падліках складала некалькі галасоў, а пасьля — больш і больш, так што склала ўжо дзясяткі і сотні. І нават сёньня розьніца ў падліках вельмі істотная. Насамрэч адбыўся байкот, але адміністрацыйнымі рэсурсамі робіцца ўсё, каб давесьці гэта было нельга».

Як паведамілі назіральнікі Фрунзенскай выбарчай акругі № 101, усе свае заўвагі і скаргі бліжэйшым часам яны накіруюць у акруговую і Цэнтральную выбарчую камісіі.
XS
SM
MD
LG