Лінкі ўнівэрсальнага доступу

Нацыянальны каардынатар грамадзянскай кампаніі «За справядлівыя выбары» Сяргей Калякін сёньня наведаў Генэральную пракуратуру Беларусі.

«Я выпісаў там тры сказы, якія ад майго імя паўтараюцца шмат разоў, пераважна ў матэрыялах БелаПАН. Прававога аналізу іх я яшчэ не рабіў, не было пакуль часу. Але на першы погляд я ня бачу там нейкіх праблем. Мае выказваньні не закранаюць рэчаў, якія падпадаюць пад дзеяньне Крымінальнага кодэксу. Я буду абскарджваць вынясеньне мне папярэджаньня», — сказаў палітык.

«Свабода» ўжо паведамляла, што 11 верасьня Сяргей Калякін атрымаў ліст з Генэральнай пракуратуры Беларусі. У ім утрымлівалася афіцыйнае папярэджаньне за «распаўсюд у інтэрнэт-крыніцах цьверджаньняў, якія не адпавядаюць рэчаіснасьці, аб сыстэматычных парушэньнях заканадаўства падчас правядзеньня выбарчых кампаніяў у Рэспубліцы Беларусь, у тым ліку арганізацыі і правядзеньня выбараў у Палату прадстаўнікоў пятага скліканьня». У лісьце таксама падкрэсьлівалася, што такая дзейнасьць недапушчальная. І калі Сяргей Калякін яе ня спыніць, то яго прыцягнуць да крымінальнай адказнасьці.

Сяргей Калякін патлумачыў, што ён сёньня хадзіў у Генэральную пракуратуру для таго, каб яму далі азнаёміцца з інтэрнэт-крыніцамі, матэрыялы якіх леглі ў аснову папярэджаньня, — бо ў лісьце з пракуратуры яны не называліся.
XS
SM
MD
LG