Лінкі ўнівэрсальнага доступу

Справа Леаніда Кавалёва адновіцца


У Менскім гарадзкім судзе 6 верасьня чакаецца аднаўленьне разгляду справы былога намесьніка старшыні Віцебскага аблвыканкаму, былога першага сакратара БРСМ Леаніда Кавалёва.

Пра гэта карэспандэнту «Свабоды» паведамілі ў канцылярыі суду па крымінальных справах. Справу разглядае судзьдзя Ўнукевіч.

Працэс над Леанідам Кавалёвым пачаўся яшчэ ў лістападзе 2011 году, у сьнежні яго прыпынілі на экспэртызу. Працэс не закрыты, але больш ніякіх зьвестак у судзе не даюць. У тым ліку не паведамляюць артыкул, паводле якога абвінавачаны былы намесьнік старшыні Віцебскага аблвыканкаму Леанід Кавалёў.

Леанід Кавалёў быў арыштаваны ў Віцебску ў чэрвені 2011 году. З таго часу па горадзе ходзяць чуткі, што ў кабінэце былога намесьніка старшыні гарвыканкаму знайшлі вялікую суму грошай і што нібыта ў яго былі вялікія прыбыткі па-за афіцыйнай працай.

Кар’ерны ўзьлёт былога старшыні калгасу ў Баранавіцкім раёне Леаніда Кавалёва пачаўся з кіраўніцтва грамадзкім аб’яднаньнем БРСМ.

У 2005–2008 гадах Кавалёў быў другім, а потым і першым сакратаром арганізацыі, якую ў народзе называюць «лукамолам». Назіральнікі адзначаюць, што якраз у той час прайшлі прэзыдэнцкія выбары, якія скончыліся разгонам пратэстнага лягера на Кастрычніцкай плошчы з арыштам некалькіх соцень тых, хто быў супроць фальшаваньня выбараў. Кіраўнікі БРСМ вынікі выбараў віталі і аднымі зь першых павіншавалі Аляксандра Лукашэнку з «элегантнай перамогай».

Пасьля БРСМ Леанід Кавалёў крыху папрацаваў у Менскім аблвыканкаме, потым — намесьнікам Віцебскага гарвыканкаму, а апошнія паўтара года да арышту — намесьнікам старшыні Віцебскага аблвыканкаму. Жыхары Віцебску згадваюць: пасьля арышту Леаніда Кавалёва гаварылі, што неўзабаве будзе суд над ім у Віцебску, але потым размовы пра гэта спыніліся. Яшчэ праз пэўны час пайшла гаворка, што за Кавалёва перад начальствам рэспубліканскага ўзроўню нібыта заступілася кіраўніцтва вобласьці, і ў выніку справу забралі ў Менск, каб там увогуле «пахаваць».
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG