Лінкі ўнівэрсальнага доступу

Разгляд справы аб закрыцьці «Плятформы» прызначаны на 6 верасьня


Судзьдзя Менскага гаспадарчага суду Алег Клюйко заслухаў бакі ў гэтай справе: прадстаўніка падатковай інспэкцыі Савецкага раёну Менску Дзьмітрыя Содаля і лідэра «Плятформы» Андрэя Бандарэнку, а таксама вывучыў дакумэнты па гэтай справе.

Істотных хадайніцтваў у бакоў не было. Пачатак працэсу прызначаны на 6 верасьня на 14.20.

Падставай для працэсу стала заява ў суд з боку інспэкцыі па падатках і зборах Савецкага раёну.

Як паведамілі праваабаронцы, будучы судовы разгляд ня ёсьць для іх чымсьці нечаканым. Апошнім часам «Плятформа» адчувае масіраваны ціск з боку розных дзяржаўных структураў. Кіраўніка арганізацыі Андрэя Бандарэнку сёлета ў ліпені-жніўні супрацоўнікі міліцыі двойчы дастаўлялі ў падатковую інспэкцыю, нягледзячы на тое, што сустрэчы «Плятформы» з падатковым інспэктарам былі загадзя ўзгодненыя праваабаронцамі.

У жніўні арганізацыя павінна была аплаціць штраф за тое, што не апавясьціла падатковы орган пра зьмену месца свайго знаходжаньня. Паводле праваабаронцаў, для іх застаецца загадкай, «якім чынам праходзіла ўстанаўленьне факту незнаходжаньня „Плятформы“ па юрыдычным адрасе, калі арганізацыя па ім знаходзіцца».

Андрэй Бандарэнка: «Гістэрыя вакол нас, якая ідзе ад пэўных дзяржструктураў, здаецца, перадалася ўжо і супрацоўнікам падатковай інспэкцыі. Відаць, наша арганізацыя перашкаджае пэўным чыноўнікам, бо абараняе простых грамадзянаў Беларусі ад самавольства ўладаў».
XS
SM
MD
LG