Паводле дадзеных амэрыканскага цэнтру па кантролі і прафіляктыцы захворваньняў, у гэтым годзе было зарэгістравана 1118 выпадкаў гэтага захворваньня, больш за сорак чалавек памерлі. Толькі за апошні тыдзень захварэлі каля 700 чалавек і памерлі 36.
Паведамляецца, што федэральныя ўлады пастаўленыя ў тупік імклівым распаўсюджваньнем гэтай хваробы.
Больш за палову хворых у гэтым годзе — жыхары Тэхасу, аднак цяпер «вірус Заходняга Нілу» знойдзены ў 47 штатах, у 38 зь іх гэта захворваньне зарэгістравана ў людзей.
Ва Ўсходняй Эўропе таксама вірус імкліва распаўсюджваецца. Напрыклад, у Расеі у Валгаградскай вобласьці знаходзіцца каля 100 чалавек з падобным дыягназам, двое ўжо памерлі.
Пераносчыкамі вірусу зьяўляюцца камары, а таксама птушкі і грызуны. Ліхаманка Заходняга Нілу мае выразную сэзоннасьць — з чэрвеня па кастрычнік, калі ўмовы для распаўсюду камароў найбольш спрыяльныя.
Упершыню вірус ліхаманкі заходняга Нілу быў знойдзены ў Угандзе ў крыві хворай жанчыны ў 1937 годзе.
