Лінкі ўнівэрсальнага доступу

Выбары-2012: «Спадзяваньняў на рэгістрацыю ўсё меней…»


На гэтым тыдні завершыцца рэгістрацыя кандыдатаў у дэпутаты Палаты прадстаўнікоў. Сярод вылучэнцаў нямала і прадстаўнікоў апазыцыі. Але многія зь іх лічаць, што спадзяваньняў на рэгістрацыю кандыдатамі ў іх амаль няма.

Барысаў

Галоўны рэдактар недзяржаўнай газэты «Барысаўскія навіны» Анатоль Букас, які вылучаецца кандыдатам у дэпутаты, паведаміў сёньня «Свабодзе», што сутыкнуўся з адміністрацыйным уціскам з боку мясцовых чыноўнікаў:

Букас: «Зараз зрэзалі вулічную шыльду над рэдакцыяй…А ўчора да мяне прыяжджалі супрацоўнікі мясцовай улады наконт агароджы вакол дома. Чыноўнікі запэўнівалі, што нібыта ёсьць рашэньне Барысаўскага райвыканкаму на знос гэтай агароджы. Таму я таксама ўчора накіраваў сваю скаргу ў суд Барысаўскага раёну. Але прашу, каб гэты разгляд вёўся у судзе Крупскага раёну, бо мясцовыя ўлады могуць неяк паўплываць на рашэньне суду.

Таксама гэтымі днямі я забраў у Дзяржаўтаінспэкцыі талён на права кіраваньня аўтамабілем, паколькі мяне сёлета ў ліпені наўмысна пазбавілі пасьведчаньня кіроўцы. І калі я зьвярнуўся са скаргай у Вярхоўны суд, то той адмяніў пастанову начальніка Барысаўскай ДАІ, а таксама рашэньне Барысаўскага райсуду й Менскага абласнога суду…»

Карэспандэнт: «Гэта дае Вам спадзяваньні на тое, што рэгістрацыя ў якасьці кандыдата адбудзецца?»

Букас: «Я ад 1995 году вылучаўся кандыдатам у дэпутаты. Гэта агулам адбывалася 8 разоў. І толькі двойчы рэгістрацыя адбывалася на месцы, а ў астатнія 6 разоў мне давялося зьвяртацца ў ЦВК, і толькі тады ў акруговай камісіі сытуацыю выпраўлялі. Таму і гэты раз вялікіх спадзяваньняў у мяне няма…»


На Гарадзеншчыне назіральнікі ад Беларускага Хэльсынскага камітэту сьведчаць, што сутыкаюцца з праблемамі атрыманьня інфармацыі ў выбарчых камісіях, у той час, калі назіральнікам ад СНД у камісіях прадстаўляюць поўную інфармацыю.

Вялікая Бераставіца

Назіральнікі ад Беларускага Хэльсынскага камітэту ў Горадні Раман Юргель і Алег Рамашкевіч зь Вялікай Бераставіцы пісьмова зьвярнуліся ў выбарчыя камісіі з просьбай удзельнічаць у праверцы подпісаў і іншых дакумэнтаў, прадстаўленых прэтэндэнтамі ў кандыдаты.

Абодва атрымалі аднолькавыя адказы, у якіх гаворыцца, што прысутнічаць пры падліку галасоў яны могуць, а правяраць подпісы і іншыя дакумэнты ня маюць права.

Раман Юргель з гэтым не згаджаецца, кажа, што камісіі спасылаюцца на артыкул 13-ты выбарчага кодэкса, але і праваабаронцы таксама спасылаюцца на гэты ж артыкул, паколькі там запісана, што выбары павінны быць празрыстымі.

Юргель: «Тэхнічна ў законе гэта не прапісана. Гэта значыць, не забаронена, а залежыць ад рашэньня старшыні камісіі. А паколькі ўсе камісіі працуюць пад кіраўніцтвам ЦВК, то, напэўна, паўсюдна атрымалі загады, каб нас не дапускаць да праверкі подпісаў выбарцаў і дакумэнтаў вылучэнцаў у кандыдаты».

У той самы час, паводле Юргеля, назіральніку ад краінаў СНД Сяргею Камянецкаму, былому дэпутату Палаты прадстаўнікоў, была прадстаўлена поўная інфармацыя аб выбарчым працэсе ў камісіях Горадні.

Юргель: «Ён аб’езьдзіў усе акруговыя камісіі ў Горадні, і ўсюды яму дазволілі азнаёміцца з дакумэнтамі, зь якімі нам не даюць магчымасьці азнаёміцца. Гэта інфармацыя з афіцыйнай абласной газэты, а таму яе можна лічыць афіцыйнай».


Магілёў

Скаргі — зброя супраць незалежнага вылучэнца
У Магілёве на незалежных прэтэндэнтаў у акруговыя камісіі паскардзілася кіраўніцтва жыльлёва-эксплюатацыйнага прадпрыемства. Заяўнікі вінавацяць сяброў іх ініцыятыўных груп у тым, што яны парушалі парадак у інтэрнатах, калі зьбіралі подпісы.

На незалежнага прэтэндэнта Леаніда Падбярэцкага, якога падтрымлівае грамадзянская кампанія «Гавары праўду», у акруговую камісію № 84 паступілі дзьве скаргі. Адміністрацыя прадпрыемства, паводле Падбярэцкага, вінаваціць сяброў яго ініцыятыўнай групы ў тым, што яны намагаліся праварвацца ў інтэрнат, каб зьбіраць подпісы, ігнаруючы тлумачэньні, што гэтым яны перашкаджаюць адпачываць жыхарам.

Падбярэцкі: «Яны хочуць з дапамогай гэтых скаргаў зрабіць мне папярэджаньне, бо другое папярэджаньне — гэта зьняцьце цябе з выбарчай дыстанцыі. Я ім стаў небясьпечны, наколькі я зразумеў. Калі яны вынесуць мне папярэджаньне, я тут жа зьвярнуся ў суд. Гэтыя інтэрнаты — вотчына чалавека, які зьяўляецца дзейным дэпутатам».

Высьветліць, што канкрэтна парушылі сябры ініцыятыўнай групы Падбярэцкага ў жыльлёва-эксплюатацыйным прадпрыемстве, не ўдалося. Гаварыць на гэтую тэму адмовіліся. Прадстаўнік адміністрацыі заявіў:

«У камандзе мы ні з кім не працуем. Мы працуем у камандзе з Канстытуцыяй Рэспублікі Беларусь і ў камандзе з законамі Рэспублікі Беларусь».

Другі вылучэнец на дэпутацтва, на якога паскардзіліся ў акруговую камісію № 85, прыхільнік «Руху за свабоду» Уладзімер Пунчанка вінаваціць саміх скаржнікаў у тым, што менавіта яны перашкаджалі сябрам ініцыятыўнай групы зьбіраць подпісы ў яго падтрымку, чым парушылі выбарчае заканадаўства:

«На мяне нагаварылі, што я намагаўся прарвацца ў інтэрнат для збору подпісаў, што размахваў пашпартам, — карацей, неадэкватна сябе паводзіў. Я скаргу напісаў таксама, што гэта ўсё нагаворы чыстай вады. Я так разумею, што тут задзейнічаны розныя выбарчыя тэхналёгіі. Зразумела, супернікі ёсьць супернікі».


Віцебск

Забаранілі 15 пікетаў пра байкот выбараў
У Віцебску забаранілі 15 пікетаў пра байкот выбараў. Мясцовыя сябры КХП БНФ падавалі па 5 заявак у тры раённыя адміністрацыі абласнога цэнтру, але адусюль атрымалі адмовы.

Пра прычыны мясцовай канфліктнай сытуацыі «Свабодзе» паведаміў партыйны актывіст Ян Дзяржаўцаў:

«З тае нагоды, што выбараў у нас фактычна няма, што выбары — гэта „лахатрон“, падалі заяўкі тры чалавекі. Падалі на пікеты ў месцах, вызначаных уладамі. І ўсім ім адмовілі».

Паводле Яна Дзяржаўцава, прычына адмовы стандартная: да заявак не прыклалі дамовы з ЖКГ, міліцыяй і мэдыкамі на абслугоўваньне імпрэзаў. Як сьведчыць папярэдні досьвед, такія дамовы з апазыцыянэрамі заключаць адмаўляюцца, чакаючы «вэрдыкту» ўладаў.

Пікеты меліся адбыцца падчас агітацыйнай кампаніі, але ў Цэнтрвыбаркаме лічаць, што падобныя акцыі да выбараў дачыненьня ня маюць, і таму тут ня дзейнічае спрошчаны парадак правядзеньня, як у агітацыйных пікетаў. Такі адказ атрымаў Ян Дзяржаўцаў, калі запытваўся ў ЦВК, як праводзіць пікеты за байкот:

«Мы падавалі заяўкі на час агітацыйнай кампаніі. Але ёсьць рашэньне Цэнтрвыбаркаму, што гэта нібыта самыя звычайныя пікеты, і да кампаніі яны ня маюць дачыненьня. Але з пачаткам агітацыйнай кампаніі мы ўсё адно будзем ладзіць пікеты, раздаваць нейкія матэрыялы, размаўляць зь людзьмі»…

Такім чынам, ладзіць пікеты віцебскія актывісты КХП БНФ плянуюць, нават нягледзячы на забарону.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG