Мастацкі фільм «У тумане» рэжысэра Сяргея Лазьніцы паводле аповесьці Васіля Быкава пакажуць 17 жніўня на конкурсе «Выбарскі рахунак» кінафэстывалю «Акно ў Эўропу».
Фэст «Акно ў Еўропу» праходзіць у Выбаргу з 12 па 19 жніўня. У яго рамках будзе паказана 76 карцін.
На фэстывалі праходзяць тры конкурсы:
гульнявога
дакумэнтальнага
анімацыйнага кіно
Таксама праводзіцца конкурс «Выбарскі рахунак», у якім пераможцы вызначаюць гледачы, удзельнікі фэстываль, журналісты і сябры журы. Пераможца «Выбарскага рахункі» атрымлівае галоўны прыз фэстывалю — «Залатую ладзьдзю».
Раней кінастужка «Ў тумане» атрымала прэстыжную ўзнагароду журы Міжнароднай асацыяцыі кінакрытыкаў Канскага кінафэстывалю (FIPRESCI) і заваявала Гран-пры VI Міжнароднага кінафэстывалю «Люстэрка».
Фільм стаў пераможцам IX Міжнароднага кінафэсту ў Ерэване «Залаты абрыкос» у намінацыі «Гульнявое кіно», быў прызнаны лепшым на трэцім Адэскім міжнародным кінафэстывалі.
Сам рэжысэр Сяргей Лазьніца назваў гэты фільм драмай «пра чалавека, які спрабуе зрабіць маральны выбар у амаральных абставінах». Галоўнага героя, пуцявога абходчыка Сушчэню, якога вінавацяць у супрацоўніцтве з акупантамі, грае беларускі актор Уладзімір Сьвірскі.
У здымачнай групе працавалі беларусы, латышы, літоўцы, немцы, расейцы, палякі, румыны, чэхі. Бюджэт фільму — прыкладна 2 мільёны эўра.
Карціну зьнялі за 28 дзён у Латвіі. Гэта міжнародны кінапраект, яго ўдзельнікі — «Беларусьфільм», MA.JA.DE Fiction (Нямеччына), кінакампанія «Джы Пі» (Расея), Rija Films (Латвія), Lemming Film (Нідэрлянды), Фонд падтрымкі эўрапейскага кіно EURIMAGES.
Сяргей Лазьніца нарадзіўся ў Баранавічах, вучыўся ў Кіеве, працаваў у Маскве, 10 гадоў таму эміграваў у Нямеччыну. Цяпер жыве ў Бэрліне.
