Лінкі ўнівэрсальнага доступу

logo-print

6 жніўня заля рэдкай кнігі бібліятэкі Акадэміі навук ледзь зьмясьціла ўсіх гасьцей прэзэнтацыі кнігі Уладзімера Арлова і мастака Зьмітра Герасімовіча «Вялікае княства Літоўскае. Ілюстраваная гісторыя».

«Аляксандар Рыгоравіч Лукашэнка для ўзьняцьця патрыятызму параіў кожнай сям’і набыць слуцкі пояс. Я асьмелюся параіць больш танны праект: каб дзяржава парупілася, каб у кожнай сям’і была кніжка Ўладзімера Арлова і Зьмітра Герасімовіча. Я думаю, што гэта скароціць сродкі і на выданьне для вышэйшых навучальных устаноў „Асноваў ідэалёгіі беларускай дзяржаўнасьці“ і зьменшыць штат палітычных агітатараў ва ўстановах і прадпрыемствах», — так пачаў свой выступ навуковы рэцэнзент Уладзімер Ляхоўскі.

«Вялікае княства Літоўскае. Ілюстраваная гісторыя» — гэта своеасаблівы працяг кнігі «Краіна Беларусь», якая пабачыла сьвет у 2003 годзе. Цяпер Уладзімер Арлоў і Зьміцер Герасімовіч сканцэнтраваліся на пэрыядзе існаваньня ВКЛ. Кніга пачынаецца разьдзелам «Славяне і балты», але не заканчваецца 1795-м годам, калі, як заўважыў Уладзімер Арлоў, «гістарычны гадзіньнік Вялікага княства прабіў апошні раз»:

«Ідэя Вялікага княства працягвала жыць. Яна натхняла новыя і новыя пакаленьні патрыётаў, і зноў рабіліся спробы адраджэньня дзяржаўнасьці. У 1811 годзе група ліцьвінскіх магнатаў на чале зь Міхалам Клеафасам Агінскім падала першы значны праект будучай Канстытуцыі. У 1812 годзе княства на кароткі тэрмін было адноўлена падчас напалеонаўскай кампаніі. Ідэя аднаўленьня Вялікага княства натхняла паўстаўнцаў 1831 году, удзельнікаў тайных таварыстваў — ад філаматаў і філарэтаў да масонскіх ложаў».



Далей ідэю ВКЛ Уладзімер Арлоў і Зьміцер Герасімовіч шукаюць у ХХ стагодзьдзі: у пэрыядзе нашаніўскага адраджэньня, Беларускай Народнай Рэспублікі, абвяшчэньні незалежнасьці Літвы і Беларусі. Аўтары прыадкрываюць мала вядомыя шырокаму колу старонкі гісторыі. Напрыклад, пішуць пра дзяржаву Сярэдняя Літва, што існавала ў пачатку ХХ стагодзьдзя альбо пра 40 дзён, цягам якіх у 1939 годзе Вільня належала Беларускай СССР. Заканчваецца кніга разьдзелам пра беларускую нацыянальную меншасьць у сучаснай Літоўскай рэспубліцы.

«Вялікае княства Літоўскае. Ілюстраваная гісторыя» зьмяшчае 2000 унікальных летапісных мініятур, гравюр, фатаграфій і рэканструкцый. Матэрыялы для ілюстрацый Зьміцер Герасімовіч зьбіраў у прыватных калекцыях, у архівах і музэях Беларусі і краін-суседак:

«Большасьць ілюстрацый паходзіць з матэрыялаў Нацыянальнага музэю ў Кракаве, — расказаў „Свабодзе“ Зьміцер Герасімовіч. — Багата інфармацыі па гісторыі Вялікага княства знаходзіцца ў архівах Санкт-Пецярбургу і Масквы. Скарыстацца імі мне не ўдалося: туды вельмі цяжка трапіць дасьледчыку беларускай гісторыі».

Увосень чакаюцца з друку пераклады на рускую і ангельскую мовы кніг «Краіна Беларусь» і «Вялікае княства Літоўскае. Ілюстраваная гісторыя». Тады аўтары паабяцалі зладзіць яшчэ адну сустрэчу з чытачамі і круглы стол з замежнымі дасьледчыкамі гісторыі некалі найбуйнейшай дзяржавы ў Эўропе Вялікае княства Літоўскае.

Зьміцер Герасімовіч, Уладзімер Арлоў і Зьміцер Санько

Зьміцер Герасімовіч, Уладзімер Арлоў і Зьміцер Санько

Аўтограф для Акадэмічнай бібліятэкі

Аўтограф для Акадэмічнай бібліятэкі

Рэдактар кнігі Зьміцер Санько.

Рэдактар кнігі Зьміцер Санько.

Ілюстратар кнігі Зьміцер Герасімовіч.

Ілюстратар кнігі Зьміцер Герасімовіч.

Паказаць камэнтары

XS
SM
MD
LG