Лінкі ўнівэрсальнага доступу

Менскі гарадзкі суд прыняў да разгляду матэрыялы крымінальнай справы супраць былога начальніка сакратарыяту Савету Рэспублікі Нацыянальнага сходу Беларусі Глеба Бядрыцкага.

«Цяпер судзьдзя знаёміцца з матэрыяламі. Дата пачатку судовых слуханьняў будзе прызначаная на працягу бліжэйшых сямі дзён», — паведамілі Інтэрфаксу ў Менскім гарадзкім судзе.

Крымінальная справа супраць колішняга начальніка сакратарыяту Савету рэспублікі складае 47 тамоў.

Бядрыцкага затрымалі ў кастрычніку 2011 году ў ягоным працоўным кабінэце.

Чыноўніка зьвінавацілі ў крадзяжы праз злоўжываньне паўнамоцтвамі і службовым становішчам.

Абвінавачаны накіроўваў прашэньне Аляксандру Лукашэнку, каб яго вызвалілі ад крымінальнай адказнасьці.

«Калі справа накіраваная ў суд — значыць, прашэньне адхіленае», — растлумачылі Інтэрфаксу ў праваахоўных органах.

Глеб Бядрыцкі раней займаў розныя пасады ў Міністэрстве архітэктуры і будаўніцтва, амбасадзе Беларусі ў Нямеччыне, а пазьней — у апараце Савету міністраў. На пасаду начальніка сакратарыяту Савету Рэспублікі Нацыянальнага сходу Беларусі быў прызначаны ў 2003 годзе.
XS
SM
MD
LG