Лінкі ўнівэрсальнага доступу

logo-print

Каля дзьвюх тысяч назіральнікаў зьбіраецца вылучыць на выбарах дэпутатаў Палаты прадстаўнікоў грамадзкая кампанія «За справядлівыя выбары». Тым часам Цэнтральная выбарчая камісія ўжо афіцыйна зарэгістравала каля 300 унутраных назіральнікаў.

У Беларусі афіцыйна зарэгістраваныя 294 унутраныя назіральнікі, якія зьбіраюцца працаваць на восеньскіх выбарах. Гэтую лічбу назваў сёньня «Свабодзе» сакратар Цэнтральнай выбарчай камісіі Мікалай Лазавік.

«Пяць зь іх будуць працаваць у ЦВК, астатнія — у акруговых выбарчых камісіях. Назіральнікаў ва ўчастковыя камісіі пакуль не пасылалі, бо такія камісіі яшчэ фармуюцца. Іх будуць ствараць да 8 жніўня, паводле каляндарнага пляну».

Сярод зарэгістраваных назіральнікаў ёсьць і валянтэры з грамадзкай кампаніі «За справядлівыя выбары», кажа нацыянальны каардынатар кампаніі Віктар Карняенка. Зь імі ўжо праводзяцца заняткі і трэнінгі:

Віктар Карняенка

Віктар Карняенка

«Падрыхтаваныя мэтадычныя дапаможнікі — і для назіральнікаў, і для сябраў камісіяў. А таксама рабочыя сшыткі, паводле якіх яны будуць працаваць. Гэта такая інструкцыя, якую павінен выканаць кожны чалавек, які будзе працаваць у нашай кампаніі. І там літаральна па пунктах усё расьпісана, што яму неабходна зрабіць».

У рамках кампаніі «За справядлівыя выбары» плянуюць працаваць і назіральнікі ад Аб’яднанай грамадзянскай партыі, кажа намесьнік партыйнага лідэра Васіль Палякоў. Гэтым разам партыя хоча павялічыць колькасьць валянтэраў і за кошт беспартыйных:

Васіль Палякоў

Васіль Палякоў

«Мы кажам, што сапраўдных выбараў няма. Але гэта толькі нашы заявы. Вы можаце ўсё гэта спраўдзіць. Але для гэтага трэба стаць назіральнікам. Вы можаце не ўступаць у партыю. Мы вас і бяз гэтага вылучым. Вы пойдзеце назіральнікам і самі пераканаецеся — ёсьць фальсыфікацыі ці не? Вам толькі трэба сядзець на ўчастку і лічыць колькасьць выбарцаў. А пасьля — параўнаць з выніковым пратаколам і паглядзець: ёсьць празрыстасьць, няма празрыстасьці? І тады вы зробіце ўласныя высновы».

Агулам дэмакратычныя сілы разьлічваюць на дзьве тысячы назіральнікаў, падсумоўвае Віктар Карняенка:

«Мы разьлічваем, што дастаткова і паўтары тысячы чалавек, каб зрабіць рэпрэзэнтатыўную выснову. Але ў нас будзе каля дзьвюх тысяч назіральнікаў. Мы раіліся з сацыёлягамі, якім чынам нам тут паступіць. І вось гэта абсалютна дастатковая лічба, каб зрабіць высновы пра тое, як прайшла кампанія».

Выбары ў Палату прадстаўнікоў прызначаныя на 23 верасьня.

Ваша меркаваньне

Паказаць камэнтары

XS
SM
MD
LG