Лінкі ўнівэрсальнага доступу

Ці сапраўды гурт «Pussy Riot» зьяўляецца панк-гуртом і ці сапраўды ён правёў канцэрт ў маскоўскім храме Хрыста Збаўцы ў лютым сёлета? На гэтае пытаньне адказвае карэспандэнт нашага Радыё Браян Уітмар.

Трох дзяўчат з фэмінісцкага гурту «Pussy Riot» судзяць у Маскве за несанкцыянаваны канцэрт, якія яны далі ў маскоўскім храме Хрыста Збаўцы ў лютым сёлета. Але тут патрэбныя некалькі дробных удакладненьняў.

Напрыклад, «Pussy Riot» насамрэч ня панк-гурт і, насуперак распаўсюджанаму меркаваньню, не сьпявалі ў храме Хрыста Збаўцы.

Гісторыя вакол іх выступу ў храме, якая цягнецца ўжо пяць месяцаў, паказвае, наколькі інтэрнэт зьмяніў нашыя ўяўленьні аб тым, што мы лічым «рэальнасьцю».

Што ж адбылося насамрэч? А насамрэч яны, сьціпла апранутыя, каб не прыцягваць да сябе ўвагі, увайшлі ў храм, там надзелі свае маскі і скінулі верхнюю апратку, наблізіліся да алтара і пачалі... рухі, накшталт пантамімы, танцаў або скокаў. Адна дзяўчына трымала электрагітару, але яна не была падключаная. Адзін іх аднадумец здымаў дзеяньне на відэа, а іншы на кароткі час уключыў аўдыёплэер. Усё гэта заняло пару хвілін.



Пасьля яны змантавалі відэа і дадалі да яго саўнд-трэк «Панк-малебен», які быў запісаны ў іншым месцы і ўтрымліваў рэфрэн «Багародзіца, прагані Пуціна».



Гурт «Pussy Riot» выйшаў з асяродзьдзя падпольнага анархісцкага калектыву «Вайна», які сам шырока вядомы ў Расеі сваімі акцыямі, што часта абуралі грамадзкасьць, напрыклад, карцінай гіганцкага фаласа на мосьце ў Санкт-Пецярбургу. У 2011 годзе жаночая частка «Вайны» стала вывучаць досьвед фэміністычнага руху ў ЗША «Riot Grrrl».

Восеньню таго самага году «Pussy Riot» пачалі разьмяшчаць на Youtube. Дзяўчаты гурту раздавалі ананімныя інтэрвію, называючыся «Вавёркай» або «Вераб’ём».

Членства ў гэтым гурце ўзаемазаменнае, і дакладная колькасьць удзельніц невядомая. Муж адной з тых дзяўчат, што знаходзяцца цяпер у турме, Надзеі Талаконьнікавай, паведаміў, што ананімны статус членства ў гурце — гэта частка ідэалёгіі гурту, і што ў ім бралі ўдзел некалькі дзясяткаў дзяўчат.

Да відэа з храму Хрыста Збаўцы самай вядомай акцыяй «Pussy Riot» быў «канцэрт» на Краснай плошчы ў Маскве ў разгар антыпуцінскіх пратэстаў пасьля сьнежаньскіх выбараў. На гэтым роліку «Pussy Riot» сьпявалі песьню «Путин зассал». На роліку відаць, што тэхналёгія «канцэрту» была аналягічная той, што была выкарыстана для «канцэрту» ў Храме Хрыста Збаўцы.



Цяпер адвакаты Надзеі Талаконьнікавай, Марыі Алёхінай і Кацярыны Самуцэвіч сьцьвярджаюць, што абвінавачаньне іх падабаронных у хуліганстве грунтуецца ня толькі на тым, што яны зрабілі ў храме Хрыста Збаўцы, але і на відэароліку ў Youtube.

Пракуратура абвінавачвае дзяўчат у тым, што яны зайшлі ў частку храму, зарэзэрваваную для мужчын, мелі на сабе вопратку, якая відавочна супярэчыць правілам царквы, паказвалі часткі цела ў спробе адкрыта выказаць непавагу хрысьціянскага сьвету.

Але іншая частка абвінавачаньня грунтуецца на знойдзеных у канфіскаваных кампутарах файлах, дзе ў саўнд-трэку да «Панкт-малебну» выкарыстоўваецца фраза «срань гасподняя». І вось прызнаючы, што дзяўчаты ня вымавілі ў храме Хрыста Збаўцы ні слова, пракуратура лічыць, што «для тых, хто сапраўды паважае рэлігію, недапушчальна выкарыстоўваць фразу «срань гасподняя».

Паказаць камэнтары

XS
SM
MD
LG