Лінкі ўнівэрсальнага доступу

На Акрэсьціна ў Касі Галіцкай адабралі ліст да Зьмітра Дашкевіча


Касю Галіцкая

Касю Галіцкая

27 ліпеня з ізалятара на Акрэсьціна пасьля адбыцьця 10 дзён арышту выйшла актывістка Кася Галіцкая.

Дзяўчына распавяла «Свабодзе» пра інцыдэнт, які здарыўся зь ёю ў ізалятары.

«У мяне быў сшытак, у якім я пісала ліст да Зьмітра Дашкевіча зь віншаваньнямі яго з днём народзінаў. Я не пасьпела адправіць ліст да арышту і спадзявалася зрабіць гэта, як вызвалюся. Але капітан міліцыі Ясмантовіч, які праводзіў вобшук у маёй камэры, усё абшукаў і забраў гэты ліст, чаго, на маю думку, рабіць ня меў права. Бо гэта мае асабістыя запісы. З гэтай нагоды я буду, безумоўна, падаваць скаргі.

Што да ўмоваў утрыманьня, то яны збольшага залежаць ад чалавека. Любую камэру можна нармальна адмыць, і ўсё будзе добра. Мы гэтак і зрабілі, і ўсё ў прынцыпе было дастаткова цярпіма і камфортна.

Але вось тое, што мяне адразу пасьля затрыманьня трымалі 10 гадзін у „стакане“ — гэта было досыць складана, бо там вельмі мала сьвятла і няма зусім паветра, і вельмі мала месца. То бок нават не паходзіш асабліва туды-сюды. Было цяжка. А пасьля, як адвезьлі ў ізалятар — усё як заўжды, рутынна».

17 ліпеня Касю Галіцкую затрымалі ў Кастрычніцкім судзе, куды актывістка прыехала назіраць за працэсамі над дэмакратычнымі актывістамі. Судзіла Касю Галіцкую судзьдзя Маскоўскага раённага суду Тацяна Матыль.
XS
SM
MD
LG