Лінкі ўнівэрсальнага доступу

Эўрадэпутат піша генпракурору Беларусі ў абарону Дашкевіча


Марэк Мігальскі

Марэк Мігальскі

Дэпутат Эўрапейскага парлямэнту Марэк Мігальскі зьвярнуўся з адкрытым лістом да генэральнага пракурора Беларусі Аляксандра Канюка. У ім ён выказаў занепакоенасьць лёсам зьняволенага лідэра "Маладога фронту" Зьмітра Дашкевіча.

Тэкст ліста разьмешчаны на сайце эўрадэпутата.

"Як мне стала вядома, кіраўніцтва калёніі аказвае пастаянны ціск на гэтага зьняволенага, — піша Мігальскі. — Большую частку свайго зьняволеньня Зьміцер Дашкевіч правёў у штрафным ізалятары, а цяпер Глыбоцкі раённы аддзел Сьледчага камітэту пачаў супраць яго крымінальную справу паводле матэрыялаў праверкі, якія паступілі з калёніі. Дашкевіч абвінавачваецца ў "злосным непадпарадкаваньні загадам адміністрацыі калёніі" (артыкул 411 КК), яму пагражае яшчэ адзін год пазбаўленьня волі".

Я ўспрымаю крокі, якія робіць адміністрацыя Папраўчай калёніі № 13 у горадзе Глыбокае ў адносінах да Змітра дашкевіча, як ціск, катаваньне і жорсткае абыходжаньне і заклікаю спыніць перасьлед гэтага вязьня сумленьня».

Я перакананы ў тым, што бесьперапынны перасьлед Зьмітра Дашкевіча ў сувязі з парушэньнямі рэжыму скіраваны на псыхалягічны і фізычны ціск супраць яго", — піша Мігальскі.

Ён нагадвае, што беларускія ўлады маюць абавязаньне захоўваць фізычную і псыхічную недатыкальнасьць зьняволеных і, згодна з ратыфікаванай Беларусьсю Канвэнцыяй супраць катаваньняў, любыя формы катаваньняў і жорсткага абыходжаньня ў турмах недапушчальныя.

Зьміцер Дашкевіч быў арыштаваны за дзень да прэзыдэнцкіх выбараў, 18 сьнежня 2010 году, і асуджаны на два гады зьняволеньня паводле артыкулу аб злосным хуліганстве. Дашкевіча і яго таварыша па "Маладым фронце" Эдуарда Лобава абвінавацілі ў зьбіваньні двух чалавек.

Сваёй віны Зьміцер Дашкевіч не прызнае і кажа пра правакацыю спэцслужбаў. Праваабарончая арганізацыя «Міжнародная амністыя» прызнала Зьмітра Дашкевіча вязьнем сумленьня.

Нядаўна ў дачыненьні да Дашкевіча распачалі новую справу за непадпарадкаваньне загадам адміністрацыі папраўчай установы. Дашкевічу пагражае дадатковае пазбаўленьне волі яшчэ на год (цяпер яму застаецца адбыць пяць месяцаў пакараньня).
XS
SM
MD
LG