Лінкі ўнівэрсальнага доступу

Магілёўскі абласны суд не задаволіў прэтэнзій партыі БНФ


Зьміцер Салаўёў

Зьміцер Салаўёў

16 ліпеня Магілёўскі абласны суд адмовіўся ўсчаць грамадзянскую справу па скарзе партыі БНФ на неўключэньне сяброў партыі ў склад акруговых выбарчых камісіяў.

Скаргу разглядала судзьдзя Сьвятлана Стальмахова. Прадстаўляў інтарэсы партыі ў судзе кіраўнік абласной партыйнай структуры Зьміцер Салаўёў.

Салаўёў: «Нам адмовілі ва ўзбуджэньні грамадзянскай справы на той падставе, што ў пратаколе, у якім мне было даручана Соймам падаць скаргу й прадстаўляць у судзе інтарэсы партыі, не было прапісана асобным радком, што я маю права подпісу. Я лічу, што яны знайшлі выйсьце, каб не раскрываць дакумэнтаў па фармаваньні складаў камісіяў. Я лічу, што склад камісіяў дыскрымінацыйны як у сацыяльным пляне, так і палітычным. Не былі ўключаныя нашы вылучэнцы-пэнсіянэры. Іншых жа пэнсіянэраў уключалі. Не уключылі ў склад камісіі сяброў партыі, якая ўдзельнічае ў выбарах».

Зьміцер Салаўёў заяўляе, што партыя БНФ будзе абскарджваць рашэньне Сьвятланы Стальмаховай.

У акруговыя выбарчыя камісіі на Магілёўшчыне партыя БНФ вылучана 9 сваіх сяброў. Скаржнік дамагаўся, каб суд абавязаў службоўцаў прыняць новае рашэньне пра ўтварэньне акруговых выбарчых камісіяў з уключэньнем у іх склад прадстаўнікоў партыі БНФ.

Склад камісіі зацьвярджаўся на сумесным паседжаньні прэзыдыюму абласнога савету дэпутатаў і аблвыканкаму. З 32 вылучаных апазыцыянэраў у склад камісіяў уключылі толькі траіх — дваіх ад партыі левых «Справядлівы сьвет» і аднаго з АГП.
XS
SM
MD
LG