Лінкі ўнівэрсальнага доступу

Экспэрт: «Пралёт такога самалёта празь мяжу цалкам магчымы»


Аляксандар Алесін

Аляксандар Алесін

Незалежны вайсковы экспэрт Аляксандар Алесін, камэнтуючы пралёт на тэрыторыю Беларусі швэдзкага самалёта, пацьвердзіў, што гэта цалкам магчыма пры пэўных умовах.

«На звышнізкай вышыні гэта магчыма, калі паўтараць рэльеф мясцовасьці. Самалёт будзе ляцець гэтаксама, як крылатая ракета, з улікам мясцовасьці.

Калі ляцець на вышыні да 25 мэтраў, то зафіксаваць такі аб’ект вельмі складана. Патрэбнае адмысловае радыёлякацыйнае поле. Якраз зараз ствараецца радыёлякацыйная станцыя „Раса“, якая мае прыкрываць вышыню ад 0 да 25 мэтраў.

І такія выпадкі ў нас ужо былі, калі, прыкладам, зь Літвы прыляталі самалёты з кантрабандыстамі альбо проста з аматарамі вострых адчуваньняў. І сродкам супрацьпаветранай абароны не ўдавалася іх зьбіць.

А былі выпадкі, калі не ўдавалася і зафіксаваць парушэньне мяжы. Прыкладам, некалькі гадоў таму ў лесе знайшлі самалёт, які разьбіўся, разам з парэшткамі людзей. Аказалася, што яны пераляцелі зь Літвы на нашу тэрыторыю, а тут нейкім чынам ня справіліся з кіраваньнем і трапілі ў катастрофу. І да таго як іх знайшлі ў лесе, ніхто ня ведаў, што паветраная прастора была парушаная.

То бок гэта цалкам рэальная сытуацыя, асабліва ў тых мясьцінах, дзе шмат лясоў і няроўны рэльеф мясцовасьці. Гэта, дарэчы, калі рыхтуюць лётчыкаў высокага клясу, частка падрыхтоўкі — магчымасьць пераадолець зону супрацьпаветранай абароны на нізкай вышыні».

У 1987 годзе ў Маскву на лёгкім спартовым самалёце «Сэсна» зь Фінляндыі прыляцеў нямецкі лётчык-аматар Матыяс Руст. Ён заявіў, што зьбіраўся пагутарыць зь Міхаілам Гарбачовым. Палёт Руста скончыўся для яго двума гадамі ў савецкім лягеры, а для тагачаснага міністра абароны СССР і шматлікіх генэралаў — адстаўкай.

У Міністэрстве абароны Беларусі адносна відэа пра швэдзкі самалёт над Івянцом кажуць, што гэта мантаж. «Экспэрты ўжо выявілі грубую працу з элемэнтамі візуальнай фальсыфікацыі. Гэта сьведчыць пра яўна правакацыйны характар інфармацыі, якая падаецца», — паведаміў «Свабодзе» прэсавы сакратар Мінабароны Ўладзімер Макараў.

Ад Івянца да літоўскай мяжы напрасткі ня больш за 80 кілямэтраў.
XS
SM
MD
LG