Лінкі ўнівэрсальнага доступу

Amnesty International назвала Пачобута вязьнем сумленьня


Андрэй Пачобут

Андрэй Пачобут

«Журналіст Андрэй Пачобут знаходзіцца пад пагрозай турэмнага зьняволеньня на тэрмін да пяці гадоў за крытыку прэзыдэнта Беларусі. Ён зьяўляецца вязьнем сумленьня і арыштаваны ў сувязі з ажыцьцяўленьнем свайго права на свабоду выказваньня меркаваньняў», — гаворыцца ў тэрміновай заяве міжнароднай праваабарончай арганізацыі Amnesty International.


«Карэспандэнт польскай Gazety Wyborczej і выбітны актывіст польскай меншасьці ў Беларусі Андрэй Пачобут быў арыштаваны 21 чэрвеня ў сваёй кватэры ў горадзе Гродна на захадзе Беларусі. Яго абвінавачваюць у „паклёпе на прэзыдэнта“ паводле артыкула 367 (2) Крымінальнага кодэксу Рэспублікі Беларусь у сувязі з публікацыяй артыкулаў у беларускіх незалежных СМІ. Афіцыйнае абвінавачаньне яшчэ не прад’яўленае. Яго могуць зьняволіць на тэрмін да пяці гадоў.

У сваіх артыкулах Андрэй Пачобут крытыкаваў судовы працэс і вырак у справе Ўладзіслава Кавалёва і Дзьмітрыя Канавалава, якія былі расстраляныя ў сакавіку 2012 году ў сувязі з сэрыяй тэрарыстычных актаў у Беларусі. Ён таксама выступіў з крытыкай пазыцыі прэзыдэнта Лукашэнкі ў дачыненьні да Эўрапейскага Зьвязу і рэакцыі беларускіх уладаў на хвалю „маўклівых пратэстаў“ у краіне.

21 чэрвеня ў ягонай кватэры быў праведзены ператрус, у выніку чаго ягоны камп’ютар і дакумэнты былі канфіскаваныя. У сакавіку 2011 году Андрэй Пачобут быў абвінавачаны ў „абразе прэзыдэнта“ і „паклёпе на прэзыдэнта“ ў сувязі з публікацыяй артыкулаў у Gazecie Wyborczej. 5 ліпеня 2011 году ён атрымаў тры гады зьняволеньня з адтэрміноўкай выкананьня пакараньня.

Amnesty International лічыць, што арышт Андрэя Пачобута — частка працяглай кампаніі перасьледу актывістаў грамадзянскай супольнасьці і журналістаў з боку беларускіх уладаў. Пасьля прэзыдэнцкіх выбараў у сьнежні 2010 году адбылося беспрэцэдэнтнае пагаршэньне сытуацыі з правамі чалавека ў краіне. Вядучых апазыцыйных дзеячаў затрымалі і асудзілі ў выніку несправядлівых судовых пасяджэньняў. НДА, актывісты грамадзянскай супольнасьці і журналісты па-ранейшаму зазнаюць перасьлед у сувязі з крытыкай уладаў», — гаворыцца ў заяве, пераклад якой быў зроблены праваабарончым цэнтрам «Вясна».

Amnesty International зьвяртаецца да ўсіх зацікаўленых асобаў і арганізацыяў з заклікам патрабаваць ад беларускіх уладаў «неадкладнага і безумоўнага вызваленьня Андрэя Пачобута», а таксама «забесьпячэньня гарантыяў на свабоду выказваньня меркаваньняў у адпаведнасьці зь міжнароднымі абавязаньнямі ў галіне правоў чалавека, у тым ліку артыкула 19 Міжнароднага Пакту аб грамадзянскіх і палітычных правах».

Паказаць камэнтары

XS
SM
MD
LG