Лінкі ўнівэрсальнага доступу

Ужо сёньня: народзіны аўтара «1984» і новы суд над Цімашэнкай


Эпапея Джорджа Орўэла зьмяніла сьвет

Эпапея Джорджа Орўэла зьмяніла сьвет

25 чэрвеня: бліц-агляд падзеяў і тэмаў у Беларусі, сьвеце, гісторыі.

НАДВОР’Е:


Па большай частцы тэрыторыі Беларусі прагназуюць кароткачасовыя дажджы, месцамі навальніцы. Тэмпэратура ад +19 да +28.

У БЕЛАРУСІ І СЬВЕЦЕ

У Нацыянальным гістарычным музэі адбудзецца прэзэнтацыя кнігі Андрэя Лукашэвіча «Помнікі і памятныя мясьціны 1812 году ў Беларусі». Пачатак у 17.00.

В рамках фэстывалю «Магутны Божа» у менскай канцэртнай залі» Верхні горад» (пл. Свабоды, 25) пройдзе канцэрт праекту «Зоркі Мэксыкі». Пачатак у 19.00.

У Цэнтральнай навуковай бібліятэцы імя Якуба Коласа НАН Беларусі (вул. Сурганава 15, інфармацыйна-выставачны цэнтар, пакой 110) пройдзе міжнародная навукова-практычная канфэрэнцыя «Экалёгія чалавека ў рашэньні сацыяльных праблем мінулага і сучаснага грамадзтва».

У Люксэмбургу маюць адбыцца паседжаньні Радаў Эўразьвязу ў замежных і агульных справах. Сярод іншага, будзе разглядацца стратэгія Эўразьвязу ў пытаньнях правоў чалавека.

У Харкаве пачнецца паседжаньне суду, які разгледзіць новыя абвінавачаньні супраць былой прэм’ер-міністаркі Ўкраіны Юліі Цімашэнкі. Яна ўжо адбывае сямігадовы тэрмін у калёніі за перавышэньне паўнамоцтваў пры падпісаньні газавых кантрактаў з Расеяй. На гэты раз Цімашэнку абвінавачваюць у фінансавых махінацыях падчас кіраваньня карпарацыяй «Адзіныя энэргетычныя сеткі Украіны».

У вечаровым эфіры Свабоды — перадача «Праскі акцэнт». Чаго хоча дамагчыся апазыцыя на парлямэнцкіх выбарах, практыкуючы байкот, удзел у выбарах ці ціск на праўладных дэпутатаў? Над гэтым разважаюць лідэр грамадзянскай кампаніі «Наш дом» Вольга Карач, намесьнік старшыні партыі БНФ Рыгор Кастусёў і намесьніца старшыні «Маладога Фронту» Наста Палажанка.

Паважаныя слухачы! Дапамажыце больш поўна прадставіць беларускі дзень — дашліце інфармацыю пра плянаваныя падзеі, якія будуць цікавыя нашым чытачам, на адрас svaboda@rferl.org.

ТАКСАМА Ў ГЭТЫ ДЗЕНЬ:

У 1903 годзе нарадзіўся ангельскі пісьменьнік Джордж Оруэл, аўтар раману «1984» і аповесьці «Фэрма» (пераклад С. Шупа).

У 1967 годзе «Бітлз» у часе жывога тэлеэфіру прасьпявалі песьню «All You Need Is Love».

У 1984 годзе памёр Мішэль Фуко, францускі філёзаф і тэарэтык культуры.

У 1991 годзе Славенія і Харватыя прынялі дэклярацыі аб выхадзе са складу Югаслаўскай фэдэрацыі.

ЦЫТАТЫ НА ПАМЯЦЬ:

«У часы ўсеагульнага падману казаць праўду робіцца рэвалюцыйным учынкам».
Джордж Оруэл

«Душа — гэта турма цела».
Мішэль Фуко

ГОД ТАМУ Ў ЗАГАЛОЎКАХ НА САЙЦЕ «СВАБОДЫ»:

Набываць валюту на сацыяльныя мэты даводзіцца таксама ў чарзе

Дзьмітры Вус адмовіўся «стаць на шлях выпраўленьня»

Папярэджаньні за «рэвалюцыю праз сацыяльныя сеткі» ў Берасьці

XS
SM
MD
LG