Лінкі ўнівэрсальнага доступу

Кінаклюб «Невядомая Беларусь» разьвітаўся з «Гістарычнай майстэрняй»


Ігар Кузьняцоў паведамляе ўдзельнікам клюбу пра завяршэньне сустрэчаў у "Гістарычнай майстэрні"

Ігар Кузьняцоў паведамляе ўдзельнікам клюбу пра завяршэньне сустрэчаў у "Гістарычнай майстэрні"

Дыскусійнаму кінаклюбу «Невядомая Беларусь» адмоўлена ў памяшканьні для правядзеньня пасяджэньняў у «Гістарычнай майстэрні» на вуліцы Сухой.

Гэткім чынам 15-е паседжаньне кінаклюбу пад назовам «Дзьве «Лініі Сталіна» было тэрмінова арганізаванае на іншай творчай пляцоўцы Менску.

Абвесткі пра чарговую сустрэчу ў рамках дзейнасьці кінаклюбу «Невядомая Беларусь» былі разьмешчаныя ў інтэрнэце і ў сацыяльных сетках. Таму арганізатары кінапрагляду прыйшлі ў памяшканьне «Гістарычнай майстэрні», каб сустрэць гледачоў і разам перайсьці ў іншае памяшканьне. Кіраўнік кінаклюбу, кандыдат гістарычных навук Ігар Кузьняцоў на разьвітаньне сказаў наступнае:

Ігар Кузьняцоў (зьлева)

Ігар Кузьняцоў (зьлева)

«Ніводнай мэты контрэвалюцыйнага і іншага характару наш кінаклюб ня ставіў. Але мы разумеем, што „Гістарычная майстэрня“ не зьяўляецца самастойнай адзінкай на нашай тэрыторыі, што ёсьць тыя, хто робяць заўвагі і даюць рэкамэндацыі, то мы не павінны ствараць клопаты іншым людзям».

Дыскусійны кінаклюб «Невядомая Беларусь» пад кіраўніцтвам Ігара Кузьняцова ў «Гістарычнай майстэрні» праводзіў свае кінапрагляды больш за паўтара году — ад часу заснаваньня. Але напярэдадні 15—сустрэчы кіраўніцтва «Гістарычнай майстэрні» адмовіла ў памяшканьні. Дырэктар Кузьма Козак пракамэнтаваў сытуацыю гэтак:

«У „Гістарычнай майстэрні“ ёсьць накірунак, які зьвязаны з гісторыяй халякосту. А гэтыя пытаньні больш шырокія і выходзяць за пазначаныя межы».

Кінаклюб «Невядомая Беларусь» — гэта прагляд і дыскусія аб кінафільмах невядомай гісторыі Беларусі: беларускай партызанкі, сталінскіх рэпрэсіяў і іншай тэматыкі. На чарговае 15-ае паседжаньне былі прапанаваныя дзьве кінастужкі «Лінія Сталіна: гонар ці ганьба?», зьнятая тэлеканалам Белсат, а таксама прэм’ерны прагляд кінафільму «Лінія Сталіна—Гомельскі рэгіён», падрыхтаваны кааліцыяй «Наша Альтэрнатыва». Гаворыць адзін з аўтараў, які прыехаў на прэзэнтацыю фільма з Гомеля, Алесь Сівакоў:

«Фільм называецца „Лінія Сталіна— Гомельскі рэгіён“. Гэта фільм у форме ўспамінаў пра тое, што адбывалася ў тыя часы: пра раскулачваньне, высылкі, рэпрэсіі. На мой погляд, для ўладаў ніякай пагрозы ў гэтым фільме няма, а хутчэй за ўсё кожны вялікі і маленьні чыноўнік імкнецца захаваць сябе ад усялякай пагрозы».

Адзін са сталых арганізатараў і ўдзельнікаў кінаклюбу, старшыня беларускага аддзяленьня міжнароднага «Мэмарыяла» Уладзімер Раманоўскі, падкрэсьлівае, што ў свой час «Гістарычная майстэрня» была створаная Міжнародным цэнтрам ІВВ, у тым ліку, дзеля ўшанаваньня памяці ахвяраў таталітарных рэжымаў:

«Я называю гэта здрадай адносна сваіх продкаў, адносна тысячаў людзей, якія пацярпелі ад таталітарных рэжымаў. І вось такія адносіны — нібыта паўтор — гэта ўсё ж здрада».

Як паведамляюць стваральнікі кінаклюбу «Невядомая Беларусь», пра час і месца правядзеньня чарговага кінапрагляду ўсім аматарам яны будуць паведамляць дадаткова.

Дырэктар "Гістарычнай майстэрні" Кузьма Козак сярод удзельнікаў кінаклюбу

Дырэктар "Гістарычнай майстэрні" Кузьма Козак сярод удзельнікаў кінаклюбу

Паказаць камэнтары

XS
SM
MD
LG