Лінкі ўнівэрсальнага доступу

Пра палітычна-эканамічныя маніпуляцыі беларускіх уладаў на нафтавым рынку піша ў матэрыяле «Менск растварае расейскую нафту» --> http://www.gazeta.ru/business/2012/06/08/4617993.shtml расейскі інтэрнэт-рэсурс gazeta.ru.

Беларусь спыняе закупкі нафты ў Вэнэсуэле, якія вяліся з 2010 году. З эканамічнага гледзішча гэты праект аказаўся цалкам стратным, як прызналі ўлады рэспублікі. Заява прагучала на фоне чарговага скандалу: беларускія НПЗ, каб не выплачваць Расіі экспартнае мыта, замест паліва вырабляюць з расейскай нафты растваральнікі і змазачныя матэрыялы.

Беларусі няма эканамічнага сэнсу і далей імпартаваць нафту з Вэнэсуэлы. Пра гэта паведаміў у чацьвер беларускі віцэ-прэм’ер Уладзімер Сямашка, камэнтуючы спыненьне паставак. «Зрэшты, апошняе слова — за Лукашэнкам», — дадаў Сямашка.

Беларусь пачала імпартаваць вэнэсуэльскую нафту ў 2010 годзе. Тады ўрад называў гэта сваім вялікім зьнешнеэканамічным посьпехам, хоць вэнэсуэльская нафта заўсёды была для рэспублікі даражэйшай за расейскую.

У студзені-сакавіку 2012 году кошт вэнэсуэльскай нафты для Беларусі склаў 917 даляраў за тону, а расейскай — каля 442 даляраў за тону.

«Эканоміка саступала месца палітыцы. Нядаўна Сямашка прызнаў, што Беларусь купляла нафту ў Вэнэсуэлы для таго, каб дамовіцца аб куплі расійскай нафты на больш выгадных умовах», — нагадвае фінансавы аналітык Юры Дубіна. І разьлік, па словах Сямашкі, апраўдаўся. «Калі б не было паставак вэнэсуэльскай нафты ў мінулыя гады, то, напэўна, не адбылося б пагадненьня аб стварэньні адзінага рынку нафты і нафтапрадуктаў. Сёньня, дзякуй Богу, гэтае пагадненьне адбылося, і мы атрымліваем нафту на добрых умовах ад нашых партнэраў з Мытнага саюзу і Адзінай эканамічнай прасторы. На якіх умовах — вы ведаеце: гэта бяз мыта і кватаваньня, а таксама іншых падобных абмежаваньняў», — пахваліўся віцэ-прэм’ер 19 траўня ў Лёндане, дзе прымаў удзел у пасяджэньні Рады кіраўнікоў ЭБРР.

Аб спыненьні закупак вэнэсуэльскай нафты Сямашка абвясьціў праз тыдзень пасьля свайго вяртаньня з Вэнэсуэлы. Афіцыйнай «мэтай візыту было абмеркаваньне найбольш важных аспэктаў двухбаковага супрацоўніцтва». У канцы чэрвеня ў Вэнэсуэлу накіруецца Аляксандар Лукашэнка. Ці будзе абмяркоўвацца на сустрэчы з прэзыдэнтам Уга Чавэсам «нафтавае пытаньне», ці ўсё ўжо канчаткова вырашана, у беларускім урадзе не ўдакладняюць.

З 2011 году Беларусь бязмытна атрымлівае расейскую нафту і нафтапрадукты. Нафтапрадукты, якія атрымліваюцца на беларускіх НПЗ з расейскай нафты, ідуць на экспарт, а экспартнае мыта пералiчваецца ў бюджэт Расеі. Цяпер яно складае каля 270 даляраў з кожнай тоны — але распаўсюджваецца толькі на вырабленае з нафты паліва. Пазьбегнуць мыта можна, вырабляючы з нафты хімічную прадукцыю — і тады расейскі бюджэт нічога не атрымлівае. Беларусь з выгадай выкарыстоўвае гэтую акалічнасьць. «За апошнія гады Беларусь стала пастаўляць на экспарт растваральнікаў ды таксама змазачных матэрыялаў у разы больш за традыцыйных лідэраў гэтага рынку — Нямеччыну, ЗША і іншыя краіны.

«У 2011 годзе гэта прынесла звыш 1,9 мільярда, хоць яшчэ годам раней — толькі 160 мільёнаў» — кажа беларускі палітоляг Віктар Дзямідаў. — «Прасьцей кажучы, Беларусь гоніць на Захад пад выглядам хімічнай прадукцыі паліва, вырабленае з расейскай бязмытнай нафты».

На гэты факт зьвярнула ўвагу і Расея. У пачатку чэрвеня на прэсазвай канфэрэнцыі ў Менску амбасадар Расеі ў Беларусі Аляксандар Сурыкаў заявіў, што імпарт расейскіх нафтапрадуктаў Беларусьсю ў апошнія гады моцна вырас, у тым ліку ў 2012 годзе — у чатыры разы. «Беларусь імпартуе больш, чым трэба для ўнутранага спажываньня. Было заўважана, што ў справаздачнасьці Мытнага саюзу зьявіліся растваральнікі, якія не абкладаюцца мытам. Летась іх было два мільёны тон», — растлумачыў агенцтву БелаПАН Сурыкаў. Паводле яго, гэтымі пытаньнямі цяпер займаюцца адпаведныя расейскія структуры.

Калі скандал набярэ абароты, вэнэсуэльская нафта можа зноў спатрэбіцца Беларусі, іранізуюць экспэрты.

Паказаць камэнтары

XS
SM
MD
LG