Лінкі ўнівэрсальнага доступу

Затрыманьні пад Сьветлагорскам. Пашкевіча будуць судзіць


Міліцыянты затрымліваюць журналіста Аляксандра Баразенку.

Міліцыянты затрымліваюць журналіста Аляксандра Баразенку.

Міліцыя Сьветлагорскага раёну затрымала актывістаў кампанііі «Гавары праўду» і журналістаў, якія прыехалі ў вёску Якімава Слабада, каб назіраць за сходам жыхароў.

21:15 Міхася Пашкевіча затрымалі па артыкуле 23-3 «умяшальніцтва ў дзеяньні супрацоўнікаў міліцыі». 1 чэрвеня адбудзецца суд. Пашкевіч знаходзіцца ў РУУС Сьветлагорску.

19:40 Міхася Пашкевіча павезьлі ў шпіталь на мэдычнае абсьледаваньне. Усіх журналістаў і актывістаў «Гавары праўду» адпусьцілі.

19:00 Актывістка ініцыятыўнай групы Тацяна Куган і яшчэ трое сябраў групы знаходзяцца каля РУУС. Падчас затрыманьня ў РУУС трапілі толькі актывісты ГП і журналісты. А ўласна сяброў ініцыятыўнай групы, якія кіраваліся ў Баравікоўскі сельсавет, каб перадаць свае дакумэнты, не зачапілі. Цяпер, па словах Тацяны Куган, міліцыянты таксама не зьвяртаюць на іх увагу.

18:55 Журналістку Іну Студзінскую дапыталі і адпусьцілі. Яна пакінула ў міліцыі скаргу на грубыя паводзіны маёра Клепіка, які падчас выкананьня ёю журналісцкіх абавязкаў — выхаду ў просты эфір «Радыё Свабода» — заламіў ёй руку з тэлефонам і не дазволіў перадаваць інфармацыю. Той жа маёр Клепік пры затрыманьні пашкодзіў руку актывісту «Гавары праўду» Міхасю Пашкевічу.

У РУУС знаходзіцца таксама берасьцейская актывістка «Гавары праўду» Ганна Курловіч. Па словах Іны Студзінскай, журналісту Аляксандру Баразенку могуць пагражаць «суткі», але абвінавачаньне невядомае.

18:50 Журналіст інтэрнэт-газэты «Салідарнасьць» Сяргей Балай выйшаў з пастарунку. У яго канфіскавалі флэшку з адзьнятым падчас сустрэчы матэрыялам. Канфіскацыя адбылася на падставе парушэньня артыкулу пра парвядзеньне несанкцыяваных масавых мерапрыемстваў. Па словах Балая, цяпер міліцыянты высьвятляюць, хто з затрыманых зьяўляецца журналістам тэлеканалу «Белсат».

18:25 Карэспандэнт Свабоды Іна Студзінская ня здолела перадаць рэпартаж у просты эфір. Міліцыянт заламіў ёй руку.

Студзінская: Добры вечар... Вось мне замінаюць гаварыць... Міліцыянт заламвае руку і забірае тэлефон...



18:00 Міліцыянты правяраюць у затрыманых фота і відэакамэры.

31 траўня ў Якімавай Слабадзе ініцыятыўная група сустракаецца зь мясцовымі жыхарамі. Чальцы групы хочуць арганізаваць мясцовы рэфэрэндум, каб даведацца стаўленьне жыхароў да верагоднага будаўніцтва ў інхай мясцовасьці заводу беленай цэлюлозы.

Сябра ініцыятыўнай групы Тацяна Куган: «Калі яшчэ не было журналістаў, прыехала міліцыя. Мяне хацелі затрымаць. Але зьявіліся рабяты. І міліцыя напала на іх. Пазьней іх зьвезьлі».

Міхась Пашкевіч: «Зараз знаходзімся ў сьветлагорскім РУУС. Нас затрымалі, калі выяжджалі зь вёскі Якімава Слабада. Правакацыя — адмыслова інсцыянавалі парушэньне правілаў. Рэгуляванае перакрыжаваньне, не было ніякіх знакаў. Затрымлівалі і даішнікі, і міліцыя, і людзі ў цывільным. Забралі дакумэнты ў нашага кіроўцы, правы. Кіраваў затрыманьнямі маёр Клепік».

Затрыманыя Міхась Пашкевіч, Сяргей Вазьняк, Аляксандар Баразенка, Сяргей Балай і карэспандэнтка Радыё Свабода Іна Студзінская.



Журналістаў і актывістаў ГП затрымалі, калі яны паехалі ў Баравікоўскі сельсавет, каб перадаць сабраныя подпісы.

У сходзе ўдзельнічалі 150 жыхароў вёскі.

Ініцыятыўная група, куды ўваходзіць 12 чалавек, сабрала 600 подпісаў за тое, каб правесьці рэфэрэндум. Агулам у вёсцы пражывае калі 700 працаздольных жыхароў.

Першы раз ініцыяўная група спрабава правесьці сход каля птушкафабрыкі. Але міліцыянты іх адтуль прагналі.

Другі па ліку імправізаваны сход адбыўся каля вясковай крамы.


Сачыце за разьвіцьцём падзеі на сайце «Свабоды».

Паказаць камэнтары

XS
SM
MD
LG