Лінкі ўнівэрсальнага доступу

«Беларусь можа апынуцца ваеннай мішэньню»


Аляксандар Алесін
Аляксандар Алесін

Аляксандар Лукашэнка накіраваўся зь візытам у Расею для ўдзелу ў саміце АДКБ і СНД, які пройдзе ў Маскве ў аўторак. Апошнім часам узмацніліся размовы пра тое, што Масква плянуе разьмясьціць у Беларусі свае зэнітныя сыстэмы і нават ракетныя комплексы. Ці выгадны афіцыйнаму Менску такі крок, ці ён можа быць зроблены выключна пад націскам Расеі? На якім этапе ваеннае супрацоўніцтва з Расеяй можа прывесьці да страты самастойнасьці Менску ў прыняцьці ваенна-стратэгічных рашэньняў?

На гэтыя пытаньні адказвае ваенны аналітык газэты «Белорусы и рынок» Аляксандар Алесін.

— Расея зацікаўленая ў тым, каб разьмясьціць на заходніх межах Беларусі абарончыя зэнітныя сыстэмы С-400 альбо нават наступальныя ракетныя комплексы «Іскандэр». Ці тут прысутнічаюць толькі расейскія інтарэсы ці беларускае кіраўніцтва таксама мае нейкую зацікаўленасьць у такіх кроках?

— Практычна адразу пасьля прыходу да ўлады Аляксандар Лукашэнка пачаў прапаноўваць Маскве за пэўную плату ўлічваць на нашай тэрыторыі ваенна-стратэгічныя і геапалітычныя інтарэсы Расеі. То бок, і разьмяшчэньне сыстэмаў проціпаветранай абароны, што прыкрываюць Маскву, і пры неабходнасьці, разьмяшчэньне наступальных узбраеньняў.

Тут трэба падзяляць дзьве рэчы. Абарончыя С-300 і С-400 ускосна абараняюць і сам Менск, абараняючы з паветра ад патэнцыйнага ворага. Гэтыя сыстэмы вельмі эфэктыўныя і дазваляюць уцалець кіраўніку дзяржавы ў выпадку паветранай атакі на нашу дзяржаву.

Зусім іншае — наступальныя ўзбраеньні кшталту «Іскандэра». Тут прысутнічае толькі інтарэс Расеі, бо Беларусь не зацікаўленая сама ў такіх сыстэмах, бо гэта робіць нас мішэньню для авіяцыі НАТО.

— Ці можа далейшая ваенная інтэграцыя Менску і Масквы прывесьці да незваротнай сытуацыі, калі ваеннае супрацоўніцтва з Расеяй можа прывесьці да страты самастойнасьці Менску ў прыняцьці ваенна-стратэгічных рашэньняў? Ці разумее гэта беларускае кіраўніцтва, ці можа яно процістаяць такому сцэнару?

— Вельмі правільнае пытаньне. На канфэрэнцыі ў Маскве 3-4 траўня было заяўлена, што калі СПА ЗША дасягне 4-га этапу, то бок разьмяшчэньня хуткасных перахопнікаў у Эўропе, то тады падзеі прымуць незваротны характар. Расейскія наступальныя сродкі тады будуць разьмешчаныя ў Калінінградзе, на поўдні Расеі, і паводле неафіцыйных дадзеных, і ў Беларусі.

Беларусь найбольш выгадны пляцдарм у гэтым пляне. Тут будзе разьмешчаная расейская ваенная база з ракетамі «Іскандэр-М» і «Іскандэр-К», якія будуць мець большую дальнасьць. Тады, я думаю, падзеі прымуць вельмі сур’ёзны паварот, бо гэтыя ракеты могуць несьці ядзерныя боегалоўкі. Таму, калі ЗША і Расея не дамовяцца па СПА, мы можам апынуцца закладнікамі іх супярэчнасьцяў. І мішэньню.
  • 16x9 Image

    Віталь Цыганкоў

    Віталь Цыганкоў скончыў факультэт журналістыкі БДУ. Адзін з двух заснавальнікаў першага недзяржаўнага агенцтва навінаў БелаПАН. Працаваў ў газэтах «Звязда», быў карэспандэнтам у Беларусі расейскай «Независимой газеты», Associated Рress, аглядальнікам у газэце «Свабода». На беларускай Свабодзе ад 1994 году. Карэспандэнт расейскай Свабоды ў Беларусі.
     

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG