Лінкі ўнівэрсальнага доступу

Сяброўцы Дзіянава не даюць спакою


Вячаслаў Дзіянаў

Вячаслаў Дзіянаў

Як паведамляе прэсавая служба кампаніі «Рэвалюцыя праз сацыяльную сетку», 20 красавіка на памежным пераходзе Берасьце—Цярэспаль была зьнятая зь цягніка Маргарыта Лавышык — сяброўка каардынатара леташніх маўклівых акцый пратэсту Вячаслава Дзіянава.

Падчас асабістага надгляду ў яе былі канфіскаваныя ўсе носьбіты інфармацыі і ноўтбук, аднак пасьля гэтага яна была адпушчаная. Маргарыта расказала, што найбліжэйшым цягніком ёй удалося даехаць да польскага памежнага пераходу ў Цярэспале, дзе яе чакаў Вячаслаў Дзіянаў. На гэты момант маладыя людзі ўжо даехалі да Варшавы.

18 красавіка ў кватэру, якую Маргарыта Лавышык здымае разам са сваёй сяброўкай Крысцінай Кумейкай, уварваліся пяцёра невядомых. Маргарыту, якая размаўляла праз скайп зь Дзіянавым, схапілі і вывелі з кватэры. Увесь дзень ніводнае сілавое ведамства не прызнавалася ў тым, што дзяўчаты затрыманыя. Кампутар Маргарыты быў старанна правераны, была вынята ўся перапіска асабістага характару.

Увечары дзяўчаты знайшлася ў Цэнтры ізаляцыі правапарушальнікаў ГУУС Менгарвыканкаму на завулку Акрэсьціна. 19 красавіка Маскоўскі раённы суд Менску разгледзеў адміністрацыйныя справы Лавышык і Кумейкі. Абедзьвюм прысудзілі штраф 15 базавых велічыняў — паўтара мільёна рублёў — паводле артыкулу 17.1 КаАП РБ (дробнае хуліганства). Маргарыта Лавышык апавяла Свабодзе, што іх аштрафавалі, абвінаваціўшы ў нецэнзурнай лаянцы ў грамадзкім месцы.

Вячаслаў Дзіянаў кажа, што Маргарыта ня ўдзельнічала ў кампаніі «Рэвалюцыя праз сацыяльную сетку», не займалася палітычнай дзейнасьцю і ў дзень затрыманьня якраз зьбіралася ехаць да яго ў Польшчу. Ён называе гэта помстай уладаў праз родных людзей тым, да каго яны самі ня могуць дацягнуцца.
XS
SM
MD
LG