Лінкі ўнівэрсальнага доступу

26 красавіка — Чарнобыльскі шлях


Арганізатары «Чарнобыльскага шляху — 2012» мяркуюць, што на сёлетняе шэсьце 26 красавіка людзей зьбярэцца ня меней, чым на Дзень Волі.

Старшыня аргкамітэту «Чарнобыльскага шляху» прафэсар Юры Хадыка спадзяецца, што гарадзкія ўлады дадуць дазвол на акцыю:

«Мы падалі ў гарвыканкам заяўку, у якой напісана, што мы просім даць дазвол на шэсьце па першай праезнай лініі вуліцы Сурганава. Паколькі 25 сакавіка, калі сабралася ад трох да пяці тысяч чалавек, быў сапраўдны зьдзек — вымушаныя былі ісьці па ходніках, замінаючы людзям, якія там знаходзіліся, і зацягваць шэсьце. Я вельмі спадзяюся, што гарадзкія ўлады да гэтага прыслухаюцца. Бо я перакананы — людзей 26-га будзе ня меней, чым на Дзень Волі».

Заяўнікі просяць дазволіць збор на пляцоўцы каля будынка Нацыянальнай акадэміі навук з 18:00 да 18:30. Потым плянуецца шэсьце па вуліцы Сурганава да парку Дружбы народаў, дзе з 19:30 да 20:30 пройдзе жалобны мітынг. На заканчэньне акцыі яе ўдзельнікі пройдуць да Чарнобыльскай капліцы, дзе запаляць сьвечкі і пакладуць кветкі ў памяць аб ахвярах трагедыі.

На прэсавай канфэрэнцыі прадстаўнікі розных арганізацыяў акрэсьлілі свае галоўныя мэты і лёзунгі. Так, Тацяна Новікава з грамадзкай кампаніі «Астравецкая АЭС — гэта злачынства» адзначыла:

«Нашы галоўныя задачы — узьняць дзьве вельмі вялікія праблемы, якія сёньня існуюць у Беларусі. Першая — абсалютнае неапраўданае забыцьцё пра наступствы чарнобыльскай трагедыі. Трэба нагадаць людзям, што гэтыя наступствы будуць заставацца актуальнымі і небясьпечнымі на працягу сотні тысяч гадоў. Менавіта столькі будуць заставацца небясьпечнымі часьціцы плютонію, якія былі выкінутыя чарнобыльскім рэактарам.
Гэтае будаўніцтва — сапраўднае злачынства, бо яно адцягвае рэсурсы, якія можна накіраваць на рашэньне чарнобыльскіх наступстваў.

І другая праблема, пра якую мы хочам сказаць падчас „Чарнобыльскага шляху“ — гэта будаўніцтва Астравецкай АЭС і яшчэ адной атамнай станцыі. Гэтае будаўніцтва — сапраўднае злачынства, бо яно адцягвае рэсурсы, якія можна накіраваць на рашэньне чарнобыльскіх наступстваў. Гэта нейкі авантурны і абсалютна шкодны праект».

А вось прадстаўнік незарэгістраванай партыі БХД Дзяніс Садоўскі сказаў, што тэматыка «Чарнобыльскага шляху» сёлета ня будзе абмежаваная выключна экалягічнай тэматыкай:

«Надзённыя пытаньні будуць, як і заўсёды, уздымацца на гэтым «Чарнобыльскім шляху». Найперш гэта свабода палітычным вязьням. Будуць прынятыя адпаведныя дэклярацыі з заклікам да вызваленьня ўсіх палітычных вязьняў і іх рэабілітацыі. Гэты пункт мы таксама лічым адным з найважнейшых пры правядзеньні «Чарнобыльскага шляху — 2012».

Заяўку на правядзеньне шэсьця ўжо перадалі ў менскі гарвыканкам. Згодна зь дзейным заканадаўствам улады павінны паведаміць пра сваё рашэньне не пазьней як за пяць дзён да падзеі.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG