Лінкі ўнівэрсальнага доступу

Мартынаў: Тэма палітвязьняў ня мае ніякага дачыненьня да адносінаў з Эўропай


Сяргей Мартынаў
Сяргей Мартынаў

Мартынаў загаварыў пра палітьвязьняў і праблемы ў стасунках з Эўразьвязам.

У Менску ня зьвязваюць пытаньне разьвіцьця адносін з Эўразьвязам з вызваленьнем асуджаных палітыкаў.

Пытаньні памілаваньня асуджаных прадстаўнікоў апазыцыі ніякім чынам не зьвязанае з праблематыкай узаемаадносін Беларусі з Эўрапейскім Зьвязам, заявіў міністар замежных спраў Беларусі Сяргей Мартынаў.

«Гэтая тэма ня мае ня тое што непасрэднага — ніякага дачыненьня да ўзаемаадносінаў з Эўрапейскім Зьвязам», — сказаў міністар.

«Беларусь не зацікаўленая ў эскаляцыі цяперашніх рознагалосьсяў, якія, на жаль, у нас ёсьць. Наадварот, мы прапануем дээскаляцыю — сказаў Мартынаў на нарадзе па пытаньнях зьнешняй палітыкі.

«Мы прапаноўвалі канкрэтныя крокі Эўразьвязу, якія, калі б да нас прыслухаліся, ужо сёньня прывялі б да дээскаляцыі сытуацыі. На жаль, яе пакуль няма», — канстатаваў кіраўнік беларускага МЗС.

Нягледзячы на гэта, падкрэсьліў С.Мартынаў, «Беларусь, праяўляючы добрую волю, гатовая далей працаваць разам з нашымі партнэрамі ў ЭЗ, з тым, каб знайсьці ўзаемапрымальныя разьвязкі гэтай сытуацыі», цытуе Мартынава Інтэрфакс.

«Цяпер, калі Эўразьвяз зьвяртаецца да нас з прапановай пра вяртаньне амбасадараў, мы, шчыра кажучы, паціскаем плячыма і кажам: „А мы ж вас не адпраўлялі, ня супраць таго, каб вы вярталіся“. Але трэба зрабіць, каб гэта было асэнсавана і зразумела людзям».

«Калі яны вернуцца, а ў красавіку будуць зробленыя нейкія санкцыйныя захады, то што гэта за дыялёг такі? Мы ў гэтай тэме зусім адкрытыя. Амбасадары — гэта канал дыялёгу, і, вядома, яны павінны працаваць у краінах, на дабрабыт у адносінах паміж гэтымі краінамі», — заявіў міністар замежных спраў.

«Мы не прасілі эўрапейскіх амбасадараў адсюль зьяжджаць (...) Так, мы прапаноўвалі зьезьдзіць на кансультацыі двум канкрэтным амбасадарам. І мелася на ўвазе, можа, на тыдзень. (...) Крок у адказ Эўразьвязу быў відавочна непрапарцыйны, масіраваны. Але гэта была іхная ініцыятыва», — падкрэсьліў Сяргей Мартынаў.


28 лютага МЗС Беларусі забараніў уезд на тэрыторыю краіны ініцыятарам санкцыяў супраць беларускіх чыноўнікаў. Афіцыйны Менск выклікаў таксама для кансультацыяў свайго амбасадара ў Польшчы і прадстаўніка пры Эўразьвязе. Апрача таго, беларускі бок прапанаваў амбасадарам Эўразьвязу і Польшчы ў Менску выехаць зь Беларусі для кансультацыяў.

Пасьля гэтага прадстаўнікі краінаў ЭЗ дамовіліся адклікаць зь Менску сваіх амбасадараў для кансультацыяў.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG