Лінкі ўнівэрсальнага доступу

На 60-я ўгодкі Алега Мінкіна ў сацыяльных сетках Facebook, Vkontakte і Livejournal пачалася кампанія «Тыдзень з паэзіяй Алега Мінкіна». Цягам тыдня інтэрнэт-карыстальнікам прапануецца разьмяшчаць вершы паэта ў сваіх блогах.

У сваім Livejournal аўтар ініцыятывы Алесь Аркуш напісаў: «Ніяк не магу зразумець: як адзін з самых геніяльных беларускіх паэтаў-сучасьнікаў аказаўся ў забыцьці. Штосьці ў гэтай сыстэме «гуляй-поле» ня так. Літаратура ператвараецца ў базар, дзе кошты вызначаюць махляры».

Алег Мінкін нарадзіўся 31 сакавіка 1952 году ў вёсцы Чарняўка Хоцімскага раёну Магілёўскай вобласьці. Пісаць і друкаваць вершы пачаў ад пачатку 1980-х, быў удзельнікам першых незалежніцкіх суполак у Наваполацку і Берасьці. Пасьля жыў у Вільні, выдаваў газэту «Рунь». Апошнія некалькі гадоў жыве і працуе гастарбайтэрам у Маскве.

Аўтар зборнікаў паэзіі «Сурма» (1985), «Расколіна», прозы «Праўдзівая гісторыя Краіны Хлудаў» (1994), а таксама дзіцячых кніг. У 2007 годзе Мінкін атрымаў літаратурную прэмію Таварыства вольных літаратараў «Гліняны Вялес» за кнігу вершаў «Пенаты». Перакладаў паэзію Дантэ, По, Міцкевіча, Норвіда, Лесьмяна ды шмат іншых творцаў.

Паказаць камэнтары

XS
SM
MD
LG