Лінкі ўнівэрсальнага доступу

Хакейны матчы Аўстрыя-Беларусь адбудзецца пры пустых трыбунах


Заплянаваны на 6 красавіка хакейны матч паміж зборнымі Аўстрыі і Беларусі, які выклікаў вялікую спрэчку паміж уладамі правінцыі Карынтыя і аўстрыйскай фэдэрацыяй хакею, усё ж адбудзецца ў прызначаны дзень у лядовым палацы гораду Філах, але пры пустых трыбунах.

Паводле прэзыдэнта нацыянальнай хакейнай фэдэрацыі Дытэра Кальта, такое рашэньне стала адзіна магчымым кампрамісам.

Прычынай спрэчак вакол міжнароднага матча 6 красавіка, які мае адбыцца ў рамках падрыхтоўкі да першынства сьвету 2012 году і быў загадзя зацьверджаны IIHF, сталі дата і месца яго правядзеньня.

Сёлета на 6 красавіка ў католікаў прыпадае Вялікая пятніца — дзень, калі Хрыста расьпялі на крыжы. Паводле законаў паўднёвааўстрыйскай правінцыі Карынтыя, у дзень расьпяцьця Хрыста, а таксама на Каляды тут забароненыя відовішчы, у тым ліку хакейныя матчы. Таму карынтыйскія ўлады рашуча настойвалі на адмене сустрэчы.

У сваю чаргу, Аўстрыйская нацыянальная фэдэрацыя хакею з шайбай заклікала ўладныя ды рэлігійныя колы зразумець і яе няпростую сытуацыю: перанесьці матч у іншае месца немагчыма, а калі аўстрыйская зборная не згуляе з сваімі беларускімі супернікамі ў загадзя заплянаваны час, яе далейшы ўдзел у чэмпіянаце сьвету стане праблематычным.

Ідучы насустрач заўзятарам, у тым ліку і зь іншых аўстрыйскіх правінцыяў, гульню будуць трансьляваць у жывым эфіры на канале ORF, а 20-й гадзіне паводле мясцовага часу. Адвакаты нацыянальнай фэдэрацыі лічаць, што ні тэлетрансьляцыя, ні нават сама гульня, калі на ёй ня будзе публікі, не супярэчаць законам Карынтыі.

Паказаць камэнтары

XS
SM
MD
LG