НА ДВАРЫ
Днём тэмпэратура ад 7 да 15 градусаў цяпла, магчымы кароткачасовы дождж. Рэкі рыхтуюцца да вясновай паводкі, у сярэднім за суткі адзначаецца падвышэньне ўзроўню вады ад 1 да 40 см.
НЕ ПРАХОДЗЬЦЕ МІМА
У галерэі «Акадэмія» (Менск, вул. Сурганава, 14) адкрыецца дабрачынная выстава-продаж «Мастацтва дорыць надзею», арганізаваная, каб дапамагчы студэнтцы Анастасіі Майстрэнцы. Стася патрабуе сродкі на лячэньне цяжкой хваробы – саркомы лёгкага.
У Вільні ў Цэнтральным дзяржаўным архіве Літоўскай рэспублікі адкрыецца выстава «Невядомая БНР».
ТАМ, ДЗЕ НАС НЯМА
У Брусэлі пачнецца пасяджэньне Рады міністраў Эўразьвязу. Мае разглядацца пашырэньне санкцый супраць афіцыйнага Менску за працяг палітыкі рэпрэсій. Паводле неафіцыйнай інфармацыі, санкцыі могуць быць уведзеныя супраць 29 прадпрыемстваў і 12 асобаў.
У Капэнгагене пачнецца Эўрапейскі саміт рэгіёнаў і гарадоў.
ТАКСАМА Ў ГЭТЫ ДЗЕНЬ
1793 – сэнат Расейскай імпэрыі выдаў указ пра стварэньне Менскай губэрні.
1991 – у Менску пачаўся II зьезд Беларускага Народнага Фронту «Адраджэньне».
2007 – у Самалі зьбіты самалёт ІЛ–76 беларускай авіякампаніі «Трансавіяэкспарт».
У гэты дзень нарадзіліся:
1865 – Стары Ўлас, Уладзіслаў Сівы-Сівіцкі, паэт, пісьменьнік, зьбіральнік беларускага фальклёру.
1906 – Ісак Любан, беларускі кампазытар, аўтар вядомай песьні «Бывайце здаровы» на словы Адама Русака.
У гэты дзень памерлі:
1662 – Адам Саковiч, дзяржаўны дзеяч ВКЛ.
1942 – Антон Луцкевіч, беларускі палітычны і грамадзкі дзяяч, публіцыст, навуковец, выдавец.
1978 – Рыгор Шырма, беларускі харавы дырыжор, грамадзкі дзяяч, у часы Заходняй Беларусі – сакратар Таварыства беларускай школы.
ЁСЬЦЬ НАГОДА
Сусьветны мэтэаралягічны дзень. Сёлета яго тэмай абраныя «Надвор’е, клімат і вада як рухальная сіла нашай будучыні».
ЦЫТАТА НА ПАМЯЦЬ:
Кожны народ, асаблiва ж народ абяздолены, у музыцы, у любовi да песьнi бачыць i носiць свае высокiя iдэалы.
Рыгор Шырма
