Лінкі ўнівэрсальнага доступу

Генсэк Рады Эўропы прапануе «падключыць Маскву»

  • БелаПАН

Генэральны сакратар Рады Эўропы Турб'ёрн Ягланд прапануе замест санкцыяў «падключыць Расею» да дзеяньняў эўрапейскай супольнасьці адносна Беларусі.

Гэтую ініцыятыву ён агучыў 22 сакавіка ў Осла, дзе праходзіць міжнародная канфэрэнцыя па сытуацыі ў Беларусі.

Жывую відэатрансьляцыю канфэрэнцыі вядзе сайт Нарвэскага Хэльсынскага камітэту.

На думку Ягланда, Эўропа «ніколі ня зможа прымусіць Лукашэнку рэфармавацца і сысьці ад улады самастойна». «Мы маем дачыненьне з клясычным дыктатарам. Усе дыктатары маюць галоўны прыярытэт – выжываньне. Кожную раніцу яны думаюць толькі пра тое, як застацца ва ўладзе. Мы ніколі ня зможам прымусіць Лукашэнку рэфармавацца і сысьці ад улады самастойна. Эўропа і міжнародная супольнасьць спрабавалі ўжываць розныя стратэгіі ў дачыненьні да Менску, але нічога не дапамагала з-за гэтага прынцыпу выжывальнасьці», – заявіў генэральны сакратар Рады Эўропы.

Ён лічыць, што неабходна дакладна «ўсьведамляць гістарычнае мінулае, якое было ў Беларусі, і імкнуцца да сумеснай міжнароднай стратэгіі, уключаючы ўдзел Расеі ў сумесных намаганьнях».

«Лукашэнка карыстаецца адносінамі паміж Захадам і Ўсходам. Адзін год ён гуляе ў камандзе Эўропы, на наступны год пераходзіць у каманду Расеі, спрабуючы атрымаць для сябе максымальную выгаду. І Эўропа не дамаглася нічога, і ў міжнароднай супольнасьці не было адзінай пазыцыі», – канстатаваў Ягланд.

Генэральны сакратар ня верыць у выніковасьць эканамічных санкцыяў супраць Беларусі, якія плянуе 23 сакавіка ўвесьці Эўразьвяз.

«Гэта будзе мець адмоўныя наступствы для насельніцтва і адштурхне беларусаў ад Эўропы. Беларусь вельмі цесна зьвязаная з Расеяй, і мы ня зможам прымусіць Расею ўжыць санкцыі ў адносінах да Менску», – мяркуе Ягланд, на думку якога «Лукашэнка таксама надакучае кіраўніцтву Расеі».

Надакучыў ён і ўласнаму народу, заявіў генэральны сакратар Рады Эўропы. «Мы павінны інтэнсыфікаваць падтрымку грамадзянскай супольнасьці, у тым ліку і праз суседнія дзяржавы. Мы не павінны забываць на ролю царквы ў Беларусі – гэта вельмі моцны фактар і яго трэба прымаць пад ўвагу», – перакананы Ягланд.

23 сакавіка Турб'ёрн Ягланд наведае Маскву для ўдзелу ў навукова-практычнай канфэрэнцыі Расейскай Рады ў міжнародных справах.

У рамках канфэрэнцыі плянуецца двухбаковая сустрэча Ягланда з прэзыдэнтам РФ Дзьмітрыем Мядзьведзевым, падчас якой, паводле інфармаваных крыніц, будзе абмяркоўвацца ў тым ліку сытуацыя ў Беларусі.

Паказаць камэнтары

XS
SM
MD
LG