Лінкі ўнівэрсальнага доступу

logo-print

Любоў Кавалёва: «Буду змагацца далей — дзеля памяці сына!


Любоў Кавалёва

Любоў Кавалёва

Сваякі пакаранага за тэракт Уладзіслава Кавалёва прымаюць спачуваньні. Да іх пішуць і тэлефануюць зь Беларусі ды іншых краін, жыхары Віцебску нясуць кветкі. А пад домам круглыя суткі дзяжураць міліцыянты.

З вакна кватэры Кавалёвых на вуліцы Рэпіна ў Віцебску відаць машыны з супрацоўнікамі спэцслужбаў: яны дзяжураць па некалькі гадзінаў, зьмяняючы адна адну. У машынах людзі то ў форме, то ў цывільным.

Тацяна Козяр, сястра Ўладзіслава Кавалёва, часта падыходзіць да вакна — але ня дзеля таго, каб зірнуць на вуліцу. Пад вакном, у куце, стаіць столік — а на ім абразы і партрэт брата. Побач — кветкі, якія прыносяць знаёмыя і незнаёмыя людзі. Учора ўвечары каля 30-ці хлопцаў і дзяўчат зладзілі хвіліну маўчаньня проста ў пад’езьдзе, дзе жывуць Кавалёвы.



Запалілі сьвечкі на лесьвічнай пляцоўцы, паклалі кветкі, а сёньня іх забралі ў кватэру, апавяла Тацяна:

«Перанесьлі ўсё дахаты, зрабілі такі куточак для Ўладзіка. Паставілі на стол тыя кветкі, што хлопцы ўчора прыносілі, фатаздымак, сьвечкі. Проста няхай будзе памятны куток. Думалі з мамай: можа, палічку нейкую потым павесім, на яе абраз паставім, што нам таксама ўчора прынесьлі».

Супрацоўнікі міліцыі пільнуюць з машыны, хто ўваходзіць у пад’езд і хто выходзіць, працягвае сястра:

«Стаіць „уазік“, і адтуль пэрыядычна выходзіць чалавек у форме — разьмяць ногі. І чаго тая машына стаіць? Учора нікога ж не чапалі. Але і „таптуноў“ ходзіць куча! Гэта сьмешна! Ад каго яны нас ахоўваюць? Ад добрых людзей? Да нас людзі толькі падтрымаць ходзяць!»

Маці Ўладзіслава, Любоў Кавалёва, таксама кажа, што міліцэйская ахова ёй не патрэбная:

«Людзі разумныя ўсё правільна разумеюць і гадасьці рабіць ня будуць. А тых, хто здольны на гадасьці — тых мала. Мы і Ўладу заўжды казалі, што людзі нас падтрымліваюць, што людзі за нас! Ён хаця б гэта ведаў... Так што неяк трэба прыходзіць у сябе, трэба брацца за галаву, і трэба працягваць працу. Нягледзячы на тое, што ў мяне такая трагедыя здарылася, дзеля памяці сына я буду працягваць змагацца».

смс са словамі падтрымкі на адрас Любові Кавалёвай

смс са словамі падтрымкі на адрас Любові Кавалёвай



Любоў Кавалёва імкнецца гаварыць бадзёрым голасам. Але потым цішком плача, кажа дачка Тацяна. Ад цяжкіх думак ратуюць тэлефанаваньні, СМС-кі са словамі падтрымкі, допісы ў сацыяльных сетках. Таня і Любоў Іванаўна мяркуюць, што сям’і Дзьмітрыя Канавалава — другога асуджанага і расстралянага за менскі тэракт — цяпер нашмат цяжэй. Яны ня йдуць ні на якія кантакты і ўжо амаль год жывуць пад кругласуткавай аховай: нават у краму ці пагуляць з сабачкам выходзяць у суправаджэньні людзей у цывільным.

Расстрэл асуджаных да сьмяротнага пакараньня Дзьмітрыя Канавалава і Ўладзіслава Кавалёва стаў галоўнай тэмай абмеркаваньняў на віцебскіх інтэрнэт-форумах і сайтах. На сайце «Народныя навіны Віцебску» матэрыялы пра выкананьне прысуду і пра акцыі памяці Ўладзіслава Кавалёва — самыя чытаныя і камэнтаваныя, кажа рэдактар Сяргей Серабро:

«Самы папулярны матэрыял — гэта пра тое, што памяць Уладзіслава Кавалёва ўшанавалі на плошчы Перамогі. Яго за адзін дзень прагледзелі 9 тысяч чалавек, гэта рэкорд для нашага сайту. У самым першым матэрыяле, пра расстрэл, 60 камэнтароў. Прычым тыя, хто заходзіць на сайт з Расеі, пішуць, што згодныя з рашэньнем Вярхоўнага суду. А беларусы, жыхары Віцебску, у большасьці спачуваюць маці Ўладзіслава Кавалёва».
XS
SM
MD
LG