Лінкі ўнівэрсальнага доступу

Жонка галадоўніка Сяргея Каваленка Алена зьбіраецца скардзіцца на дзеяньні па прымусовым вывадзе яе мужа з галадоўкі. Ці перавялі Алеся Бяляцкага з карантыну ў атрад? Мікалай Статкевіч турбуецца пра Зьмітра Дашкевіча. Павал Севярынец не выключае, што першым з палітвязьняў вызваляць Зьмітра Бандарэнку.

Алена Каваленка зьбіраецца абскарджваць дзеяньні адміністрацыі менскага ізалятару па прымусовым вывадзе яе мужа з галадоўкі. «Гэта не лячэньне, а катаваньні», — кажа Алена Каваленка пра тое, што ў выніку гвалтоўных дзеяньняў Сяргею Каваленку паставілі кропельніцу, пасьля чаго ў яго ўтварылася гематома на руцэ. Таксама Алена Каваленка будзе абскарджваць рашэньне аб прымусовым абсьледаваньні мужа ў псыхіятрычнай лякарні. Жонка вязьня працытавала ліст, які атрымала сёньня з Дэпартамэнту выкананьня пакараньняў:

«„14.03.2012 году Каваленка С. А. агледжаны дацэнтам катэдры псыхіятрыі і наркалёгіі Беларускай мэдыцынскай акадэміі пасьлядыплёмнай адукацыі. Выстаўлены дыягназ — расстройства адаптацыі. Рэмакэндавана псыхіятрычнае абсьледаваньне на прадмет удакладненьня дыягназу і магчымага лячэньня з мэтай прадухіленьня наступстваў, якія небясьпечныя для здароўя. На падставе рэкамэндацый зараз вырашаецца пытаньне аб далейшым лячэньні Каваленкі С. А. ў псыхіятрычнай лячэбнай установе з мэтай спыненьня адмовы ад прыёму ежы“. Атрымліваецца, што ў звычайны шпіталь яго не кладуць, а зьбіраюцца пакласьці ў псыхушку і зрабіць зь яго вар’ята. Гэта я лічу працягам катаваньняў і зьдзекам, працягам таго, што ўчора яны пачалі яго прымусова лячыць».

Алена Каваленка з братам Сяргея Віталём зьбіраюцца 19 сакавіка прыехаць у Менск, каб сустрэцца зь Сяргеем Каваленкам. «Не выключаем, што ён будзе ўжо ў Навінках і сустрэчу не дазволяць, але ў нас няма іншага выйсьця», — кажа жонка галадоўніка.


Праваабаронца Алесь Бяляцкі даслаў жонцы ліст, у якім прадказвае, што 15 сакавіка яго могуць перавесьці з ізалятару ў атрад. «Ці перавялі сапраўды, невядома, але магчыма, што наступны ліст напіша ўжо з атраду», — кажа Натальля Пінчук. Пра здароўе і самаадчуваньне Алесь Бяляцкі нічога не напісаў, але паводле ліста Натальля робіць выснову, што настрой у мужа бадзёры:
Піша, што і на паветра выходзіць, і прыроду бачыць, і сонца вясновае адчувае.

«Піша, што і на паветра выходзіць, і прыроду бачыць, і сонца вясновае адчувае. Такія рэчы добрыя апісвае».

Ужо каля месяца Алеся Бяляцкага трымаюць у Бабруйскай калёніі, куды перавялі з Жодзінскага ізалятару.


Мікалай Статкевіч, былы кандыдат на прэзыдэнта, таксама піша, што шмат выходзіць на прагулкі і радуецца вясьне, якая прыйшла і ў турэмны дворык Магілёўскай калёніі. Пасьля першага за 7 месяцаў зьняволеньня тэлефоннага званку ад мужа жонка палітвязьня Марына Адамовіч атрымала ад яго яшчэ два лісты. У адным зь іх Мікалай Статкевіч выказвае занепакой лёсам Зьмітра Дашкевіча, якога днямі зноў зьмясьцілі ў карцэр Глыбоцкай калёніі. Як можа далей скласьціся лёс Дашкевіча паводле Мікалая Статкевіча?

«У апошнім лісьце піша, што зь ім могуць быць наступныя варыянты. Альбо яго рыхтуюць да пераводу ў крытую турму, альбо вядуць на 411 артыкул. Альбо каб проста даць яшчэ на паўгады ПКТ — памяшканьне камэрнага тыпу. Варыянт 411-га палохае болей за ўсё», — кажа Марына Адамовіч.

411 артыкул Крымінальнага Кодэксу — гэта злоснае парушэньне патрабаваньняў адміністрацыі месцаў пазбаўленьня волі. Максымальнае пакараньне за гэтае злачынства — да 2 гадоў пазбаўленьня волі. Паводле пакараньня, якое зараз адбывае Зьміцер Дашкевіч, яго мусяць вызваліць у сьнежні.


«Хімік» Павал Севярынец у вольны час піша чарговы артыкул — зараз да 80-годзьдзя пастара Эрнста Сабілы. На пытаньне, ці магчыма ў хуткім часе вызваленьне каго з палітвязьняў, Павал Севярынец адказаў гэтак:

«Пра сябе я не чакаю гэтага. Адзінае, што дапускаю, што могуць вызваліць бліжэйшымі днямі Дзьмітрыя Бандарэнку. Гэта, мяркую, будзе. Усё астатняе, напэўна, будзе па адным і расьцягнецца на доўгія месяцы. Таму што бачна, што Лукашэнка вядзе гандаль, гандлюе людзкімі лёсамі».

Паказаць камэнтары

XS
SM
MD
LG