Лінкі ўнівэрсальнага доступу

Берасьце. Суд абараніў чыноўніка


Дзяніс Турчаняк каля абласнога суду

Дзяніс Турчаняк каля абласнога суду

Калегія Берасьцейскага абласнога суду адмовілася задаволіць скаргу каардынатара руху «За свабоду» Дзяніса Турчаняка на намесьніка старшыні гарвыканкаму Вячаслава Хафізава.

Суд ня ўгледзеў парушэньняў з боку чыноўніка, які не прадставіў Турчаняку пэўныя рашэньні гарвыканкаму. У абласным судзе спадар Турчаняк абскарджваў аналягічнае рашэньне Ленінскага суду Берасьця.

Дзяніс Турчаняк кажа: яго ўразіла, што нават у Дзень Канстытуцыі абласны суд не абараніў яго правы:

«Хафізаў парушыў Канстытуцыю, паводле якой я маю права на атрыманьне інфармацыі аб дзейнасьці дзяржаўных органаў. Суд не прыняў гэтага пад увагу. Акрамя таго, суд не палічыў вартым увагі тое, што інфармацыя, якую я запытваў, тычыцца гісторыка-культурнай спадчыны. А я як грамадзянін маю права і абавязаны яе бараніць. Гэта прадугледжана законам аб ахове гісторыка-культурнай спадчыны».

Дзяніс Турчаняк прасіў Вячаслава Хафізава прадставіць копіі рашэньняў гарвыканкаму, зь якіх актывіст хацеў даведацца пра ўласьніка занядбанага дома ў гістарычным цэнтры гораду. Турчаняк хацеў запытацца ў гаспадара будынка, чаму гістарычная спадчына знаходзіцца ў аварыйным стане, чаму не рамантуецца будынак, унесены ў дзяржаўны сьпіс гісторыка-культурных каштоўнасьцяў.

Аднак чыноўнік адмовіўся прадставіць адпаведныя рашэньні гарвыканкаму. Пасьля гэтага Турчаняк падаў на яго ў суд.
XS
SM
MD
LG