Лінкі ўнівэрсальнага доступу

logo-print

У Казані разьбіраюцца, хто насьмерць замучыў затрыманага


Казанскі праваабарончы цэнтар і Міжрэгіянальная праваабарончая асацыяцыя «Агора» зьвярнуліся да расейскага прэзыдэнта з просьбай звольніць міністра ўнутраных спраў Татарстану Асгата Сафарава. Зварот стаў рэакцыяй на сьмерць грамадзяніна ў паліцэйскім участку Казані.

Сяргей Назараў быў затрыманы ў суботу 9 сакавіка за дробнае хуліганства. У рапарце ўчастковага сказана, што мужчына быў п'яны, нецэнзурна лаяўся і не рэагаваў на заўвагі. У той жа дзень вечарам Назараву стала кепска. Прыехала брыгада хуткай дапамогі і зрабіла яму ўкол. Ад шпіталізацыі ён адмовіўся. На наступны дзень урачоў выклікалі зноў, Назарава адвезьлі ў бальніцу з дыягназам разрыў прамой кішкі. Пацярпелага праапэравалі, аднак на наступны дзень ён памёр. Паводле сваякоў Назарава, перад апэрацыяй ён паведаміў урачам, што яго зьбілі і згвалцілі чацьвёра паліцэйскіх.

Міністар Асгат Сафараў на пашыраным паседжаньні кіраўніцтва міністэрства

Міністар Асгат Сафараў на пашыраным паседжаньні кіраўніцтва міністэрства

Міністар унутраных спраў Асгат Сафараў сёньня раніцай правёў экстраную нараду, па яе выніках звольнены начальнік аддзяленьня паліцыі і яго падначаленыя. Міністар таксама прынёс прабачэньні сям'і загінулага і паабяцаў сурова пакараць вінаватых.

Некаторыя ахоўнікі парадку спрабавалі апраўдвацца тым, што затрыманы быццам бы нанёс сабе пашкоджаньні сам, каб пазьбегнуць пакараньня. Паводле ж мэдыкаў, траўмы , якія атрымаў Назараў, былі нанесеныя тупым цьвёрдым прадметам і спосабам, які выключае самапашкоджаньне. У расейскіх мэдыях паведамляецца, што паліцэйскія гвалцілі затрыманага бутэлькай з-пад шампанскага. Сьледзтва чакае вынікаў экспэртызы.

Пахаваньне Назарава, якому было 52 гады, заплянавана на 13 сакавіка.
XS
SM
MD
LG