Лінкі ўнівэрсальнага доступу

Назіральнікі АБСЭ і ПАРЭ лічаць выбары ў Расеі несправядлівымі


«Па нашай ацэнцы, гэтыя выбары былі несправядлівымі, нягледзячы на некаторыя інавацыі ў электаральнай сыстэме», — заявіў каардынатар місіі назіральнікаў Тоні Пікуля на прэс-канфэрэнцыі ў Маскве.

Пікуля кажа,што ў часе выбарчай кампаніі былі адзначаныя перакосы ў асьвятленьні дзейнасьці аднаго з кандыдатаў, завышаныя патрабаваньні да рэгістрацыі кандыдатаў, злоўжываньне адміністрацыйным рэсурсам і адсутнасьць рэальнай канкурэнцыі.

Расейскія ўлады не забясьпечылі роўныя ўмовы для ўсіх кандыдатаў - адсутнічала рэальная канкурэнцыя, а злоўжываньне адміністрацыйным рэсурсам прывяло да таго, што пераможца выбараў быў вядомы загадзя. Акрамя таго, былі завышаныя патрабаваньні да рэгістрацыі кандыдатаў, лічаць міжнародныя назіральнікі.

Само галасаваньне прайшло без сур'ёзных парушэньняў, адзначаюць назіральнікі АБСЭ, аднак працэс падліку галасоў заслужыў адмоўнай ацэнкі амаль на траціне выбарчых участкаў, дзе прысутнічалі назіральнікі ад арганізацыі.

Назіральнікі зафіксавалі шэраг парушэньняў падчас прэзыдэнцкіх выбараў у Расеі, заявіла кіраўнік місіі назіральнікаў БДІПЧ АБСЭ Хайдзі Тальявіні. Паводле яе, гаворка ідзе ў тым ліку і выпадках ўкіданьня бюлетэняў.

У той жа час кіраўнік місіі назіральнікаў ПАРЭ Тіні Кокс, адзначыў, што прэзыдэнцкія выбары ў Расеі прайшлі лепш, чым выбары ў Дзярждуму ў сьнежні 2011 года.
XS
SM
MD
LG