Лінкі ўнівэрсальнага доступу

logo-print

Уладзімер Пуцін перамог на прэзыдэнцкіх выбарах у Расеі ў першым туры. Кіраўнік ЦВК Расеі Уладзімер Чураў кажа, што Пуцін атрымаў 63,75%. Вынікі выбараў камэнтуюць палітолягі і грамадзкія дзеячы.

Назіральнікі АБСЭ і ПАРЭ лічаць выбары ў Расеі несправядлівымі

Анатоль Лябедзька: Упершыню за доўгі час мне падабаецца тое, што адбываецца ў Расеі

Лідэр Аб’яднанай грамадзянскай партыі Анатоль Лябедзька знаходзіцца ў Маскве зь візытам салідарнасьці з расейскімі дэмакратамі. Ён сустракаўся з расейскімі палітыкамі і журналістамі, сочыць за падзеямі на месцы. Ацэньваючы ход расейскай кампаніі, Лябедзька выказвае думку, што ў Беларусі выбары адбываюцца на парадак больш брутальна і жорстка.

Анатоль Лябедзька

Анатоль Лябедзька

«Упершыню за доўгія гады мне падабаецца тое, што адбываецца ў Расеі. І гэта ўплывае на сытуацыю ў Беларусі. Упершыню ня толькі Крэмль, але і Балотная плошча фармуюць грамадзкую думку ў Расеі. І інфармацыйны паток, які зараз ідзе ў нашую краіну, мае пазытыўны зьмест».

Спадар Лябедзька мяркуе, што пасьля выбараў Пуцін можа пайсьці на палітычныя рэформы з пазытыўным зьместам.

«Пуцін не хацеў бы вяртацца ў мінулае, а хацеў бы ісьці ў будучыню, а за гэта трэба таксама плаціць. Таму калі ў бліжэйшы час у Расеі пройдуць палітычныя рэформы, вынікам якіх стануць датэрміновыя выбары ў Думу, зьяўленьне правалібэральнай партыі, у якую ўвойдуць і Кудрын, і Прохараў, і Бялых, то будзе ўжо іншы палітычны расклад у Расеі. Калі яны пойдуць на тое, каб адкрыць нейкія шлюзы для грамадзянскай супольнасьці, каб яна станавілася больш моцнай, то гэта ўжо будзе іншая Расея. А для Беларусі гэта станоўча».

Анатоль Лябедзька лічыць вельмі важным, ці будуць працягвацца выступленьні неабыякавых грамадзянаў Расеі, якія прымусілі б Крэмль ісьці на такія рэформы і грамадзкі дыялёг з грамадзтвам.


«Мы прынялі рашэньне ў ёй ня ўдзельнічаць», — сказаў афіцыйны прадстаўнік МЗС Беларусі.

Аляксандар Казулін: Пуцін будзе надалей выкарыстоўваць Лукашэнку

Экс-кандыдат на выбарах прэзыдэнта Беларусі Аляксандар Казулін мяркуе, што расейскія выбары паказалі, што іх улады ўлічваюць грамадзкія настроі:

Аляксандар Казулін

Аляксандар Казулін

«Нягледзячы на тое, што ў Расеі таксама дастаткова аўтарытарны рэжым, яны рэагуюць на тыя выклікі, якія існуюць у грамадзтве. А мы — не».

Тым ня меней кампанія ў Расеі фактычна была безальтэрнатыўнай, з загадзя вядомым вынікам, мяркуе спадар Казулін. Былі створаныя такія ўмовы, што рэальная альтэрнатыва Пуціну паўстаць не магла.

Аляксандар Казулін прагназуе, што пасьля перамогі Пуціна на прэзыдэнцкіх выбарах адносіны Масквы і Менску істотна ня зьменяцца, Расея надалей будзе захоўваць прагматызм у адносінах зь Беларусьсю:

«Факты паказваюць, што Пуцін выкарыстоўвае Лукашэнку, і гэта ўзмоцніцца пасьля выбараў. Менску трэба будзе выконваць нейкія ўмовы, пра якія мы не заўсёды ведаем».


Здановіч: «Цяпер непаразуменьняў будзе значна меней»

Уладзімер Здановіч

Уладзімер Здановіч

«Я лічу, што стасункі паміж Беларусьсю і Расеяй ніякім чынам пасьля абраньня прэзыдэнтам Уладзімера Пуціна ня зьменяцца. Будзе працяг працы па збліжэньні нашых эканомік, нашых сыстэм. У пэўны час мы пачалі будаваць саюзную дзяржаву. І, я думаю, гэтае будаўніцтва працягнецца», — завіў старшыня сталай камісіі Палаты прадстаўнікоў па адукацыі, культуры, навуцы і навукова-тэхнічным прагрэсе Ўладзімер Здановіч.

«Адносіны паміж нашымі краінамі, зыходзячы з таго, што яны складаюцца з адносінаў паміж нашымі людзьмі — беларусамі, расейцамі — яны павінны быць добрыя. Яны і раней былі добрыя, хоць і былі нейкія непаразуменьні. Думаю, што цяпер непаразуменьняў будзе значна меней».


Мілінкевіч: Абраньне Пуціна пагражае беларускай незалежнасьці

Аляксандар Мілінкевіч

Аляксандар Мілінкевіч

Лідэр руху «За свабоду» Аляксандар Мілінкевіч не ацэньвае расейскія выбары як дэмакратычныя, але ня думае, што там былі такія татальныя фальсыфікацыі, як у Беларусі:

«Памятаючы аб тым, які мэнталітэт у расейцаў, а гэта мэнталітэт часта імпэрскі, мэнталітэт стварэньня вялікай краіны, Пуцін ангажаваўся ў гэтую справу, анансаваў, што будзе Эўразійскі саюз, і я думаю, што гэта таксама адыграла вялікую ролю. А для нас гэта небясьпека».

Але, ацэньваючы перамогу Пуціна, трэба зьвяртаць увагу і на тое, хто быў яму альтэрнатывай:

«А гэта перш за ўсё камуністы, якія таксама мараць аб аднаўленьні вялікай імпэрыі. Таму пагроза для нашай незалежнасьці існавала б пры любым раскладзе. Гледзячы на нашую трагічную гісторыю зь мільёнамі ахвяраў, мысьліш, што Пуцін — меншае зло, чым камуністы. Але цяпер даводзіцца думаць, а будзе надалей Беларусь ці не?»

Паводле спадара Мілінкевіча, адносіны Лукашэнкі і Пуціна кепскія, але ў палітыцы выбіраюць з таго, што магчыма:

«У палітыцы магчымага Лукашэнка задавальняе Расею, бо яму пасьля сварак з Захадам нічога не застаецца, апрача як будаваць Эўразійскі саюз, дзе мы будзем на пэрыфэрыі».

Сяргей Калякін: Пры такіх выбарах у Беларусі Лукашэнка б ня выйграў

Пры ўсіх хібах, пра якія кажуць назіральнікі, у Расеі пры падліку галасоў існуе больш справядлівасьці, чым у Беларусі, — перакананы лідэр партыі «Справядлівы сьвет» Сяргей Калякін:

Сяргей Калякін

Сяргей Калякін

«Там існуе магчымасьць кантролю за тым, што адбываецца. Фальсыфікацыі, вядома, ёсьць, але яны зьвязаныя з рознымі тэхналёгіямі тыпу карусэляў, укіданьня бюлетэняў. У нас іншая сытуацыя, таму ўзровень фальсыфікацыяў у нас значна вышэйшы. Калі б у нас былі такія ўмовы, то наўрад ці былі б тыя вынікі, якія ў нас атрымлівае Лукашэнка на сваіх прэзыдэнцкіх выбарах. Гэта было б немагчыма».

Спадар Калякін прызнаецца, што прагназаваў, што Пуцін атрымае каля 57 працэнтаў галасоў, а ня дзьве траціны, як атрымалася.

«Тут у значнай ступені паўплывала і татальная прапаганда, няроўнасьць умоваў для ўзьдзеяньня на настроі выбарцаў, у Пуціна тут былі непараўнальныя магчымасьці. Гэта відавочнае парушэньне роўнасьці ў правах кандыдатаў. Але калі гэта параўноўваць зь Беларусьсю, то нельга не прызнаць, што і ў гэтым выбары ў Расеі былі значна больш дэмакратычнымі».

Сяргей Калякін параўнаў мэтады, якімі ўтрымліваецца ўлада ў руках Пуціна, з тым, як гэта рабілася ў Беларусі ў 2000-м годзе. Цяпер жа ў Беларусі іншая выбарчая сыстэма:

«У нас выбарац проста выключаны з вызначэньня выніку выбараў, у Беларусі ніяк не залежаць вынікі, якія абвяшчаюцца выбарчымі камісіямі, ад таго, як галасуюць людзі. Нават сябры камісіяў ня ведаюць пра фактычныя вынікі галасаваньня».

Сяргей Калякін мяркуе, што пасьля вяртаньня ў Крэмль Пуцін будзе працягваць тыя інтэграцыйныя праекты, якія былі запушчаныя раней — Мытны і Эўразійскі саюзы:

«А Лукашэнку прыйдзе час плаціць па тых абяцанках, якія дадзеныя пры атрыманьні прэфэрэнцыяў па нафце, газе і расейскіх крэдытаў. Рахункі будуць выстаўленыя. І я думаю, што ў беларускага боку ня будзе жаданьня плаціць па іх, ён будзе выкручвацца, што прывядзе да новага ўскладненьня адносін».


Паўловіч: «З Пуціным мы будзем рухацца яшчэ хутчэй»!

Намесьнік старшыні сталай камісіі Палаты прадстаўнікоў па прамысловасьці, паліўна-энэргетычным комплексе, транспарце, сувязі і прадпрымальніцтве Анатоль Паўловіч заявіў, што пасьля абраньня Ўладзімера Пуціна расейскім прэзыдэнтам інтэграцыйныя працэсы паскорацца.

«Мы спадзяемся, што з улікам тых праграмаў, у якіх Пуцін напярэдадні выбараў выклаў сваё бачаньне далейшага разьвіцьця Расеі, і з улікам яго апошняга выказваньня на адрас нашай краіны пра тое, што нам трэба ісьці і далей сумесна, інтэграцыйныя працэсы паскорацца. Беларусь і Расея павінны скарыстаць тое, што мы напрацавалі ў сваіх плянах за апошні час», — кажа Паўловіч.

«І калі чытаеш ягоную праграму далейшага разьвіцьця Расейскай Фэдэрацыі, калі бачыш, што запрацавала Адзіная эканамічная прастора, то, я думаю, мы разам будзем рухацца яшчэ хутчэй».


Уладзімер Ганчарык: Мяне добра ўразіла фігура Прохарава

Уладзімер Ганчарык

Уладзімер Ганчарык

Паводле ўдзельніка выбарчай кампаніі ў Беларусі 2001 году, прафсаюзнага лідэра Ўладзімера Ганчарыка, вынік выбараў у Расеі прадказальны, а ўмовы, у якіх яны адбываліся, нашмат лепшыя, чым у Беларусі:

«Можна сказаць, што выбары ў Расеі больш дэмакратычныя, больш сумленныя, хаця абсалютна сумленных выбараў не бывае і ў Расеі таксама выкарыстоўваўся адміністратыўны рэсурс. Мяне вельмі добра ўразіла фігура Прохарава, якая сьведчыць, што адносны выбар у грамадзян Расеі быў».

Ацэньваючы тое, як адаб’ецца вяртаньне Пуціна ў Крэмль на расейска-беларускіх адносінах, спадар Ганчарык сказаў:

«Я размаўляў сёньня з адным з расейскіх палітыкаў і выказаў спадзеў, што павінен быць больш прагматычны і рэалістычны падыход да той сыстэмы ўлады, якая сёньня ў Беларусі пануе».

Паводле Ўладзімера Ганчарыка, больш вінаваты ў тым, што адбываецца ў дачыненьнях з Расеяй, ня Пуцін, а Лукашэнка:

«Трэба разумець, што ў Расеі ёсьць свае стратэгічныя інтарэсы, Беларусь трапляе ў гэтыя інтарэсы, можна з гэтым згаджацца або не, але гэта факт. А ў тым, што самі пішчом лезем у саюзную дзяржаву і іншыя ўтварэньні, вінаватая тая сыстэма ўлады, якая ў нас ёсьць. Таму трэба самім думаць над гэтым пытаньнем».



Арцюшэнка: «Усё павінна быць прадказальным і пасьлядоўным»

Яўген Арцюшэнка

Яўген Арцюшэнка

Старшыня сталай камісіі Палаты прадстаўнікоў па гандлёва-крэдытнай палітыцы і банкаўскай дзейнасьці Яўген Арцюшэнка ў размове са «Свабодай» выказаў сваё бачаньне пэрспэктываў супрацоўніцтва Беларусі і Расеі пасьля абраньня Ўладзімера Пуціна расейскім прэзыдэнтам.

«Калі глядзець на тое, што зробленае за апошнія гады з пункту гледжаньня інтэграцыйных працэсаў, то ва ўсім гэтым Пуцін удзельнічаў асабіста. Таму па вялікаму рахунку, я лічу, што гэта будзе толькі разьвіцьцё далейшых дачыненьняў», — кажа Арцюшэнка.

«Я думаю, што гэта зьвязана як з рашэньнем унутраных эканамічных праблем, так і з разьвіцьцём геапалітычных інтарэсаў Расейскай Фэдэрацыі. Таму ўсё павінна быць прадказальным і пасьлядоўным».

Паказаць камэнтары

XS
SM
MD
LG