Лінкі ўнівэрсальнага доступу

logo-print

Фёдараў: Лукашэнка баяўся большага


Андрэй Фёдараў

Андрэй Фёдараў

Пашырэньне санкцыяў Эўразьвязу супраць прадстаўнікоў беларускіх уладаў, адказных за рэпрэсіі, перадусім носіць маральны характар, перакананы менскі палітоляг Андрэй Фёдараў.

Тое, што Славенія здолела заблякаваць унясеньне ў сьпіс неўязных буйнога беларускага бізнэсоўца Юрыя Чыжа, сьведчыць, на думку Фёдарава, пра складанасьць працэдуры прыняцьця рашэньняў Эўрапейскім Зьвязам:

«У Эўразьвязе рашэньні прымаюцца кансэнсусам, таму маленькая Славенія, і маленькі Люксэмбург, і вялікая Нямеччына маюць роўныя правы і могуць заблякаваць любое рашэньне. Іншая справа, што астатнія нейкім чынам спрабуюць узьдзейнічаць на таго, хто супраціўляецца, і большай часткай гэта ім удаецца. У дадзеным выпадку, відаць, не было такога моцнага ціску, і Славеніі ўдалося зрабіць тое, што яна хацела».

Спадар Фёдараў перакананы, што «Трайпл» і іншыя кампаніі Юрыя Чыжа не настолькі магутныя, каб санкцыі супраць іх маглі падарваць эканоміку краіны і яе кіраўнікоў:

«Так, гэта было б вельмі непрыемна, асабліва Чыжу, але казаць, што гэта можа стаць вырашальным, нельга».

Паводле спадара Фёдарава, новае рашэньне Эўразьвязу падагрэе дыскусію пра эфэктыўнасьць ягоных санкцыяў супраць афіцыйнага Менску:

«Гэта паказвае, што ніякіх сур’ёзных вынікаў гэтыя санкцыі не даюць, але зьяўляюцца маральнай падтрымкай тых, хто знаходзіцца тут у апазыцыі ўладам, якія бачаць, што тыя, хто парушае правы чалавека, нясуць нейкае, хай і сымбалічнае, пакараньне. Гэта лепш, чым нічога».

Супольны выступ Аляксандра Лукашэнкі і Дзьмітрыя Мядзьведзева супраць эўрапейскіх санкцыяў, які прагучаў на мінулым тыдні, сьведчыць, што ў Менску баяліся нечага большага, больш сур’ёзных, перадусім эканамічных санкцыяў, перакананы спадар Фёдараў.
XS
SM
MD
LG