«Пазыцыя Эўропы — гэта пазыцыя староньняга назіральніка. Калі б яны ўвялі санкцыі супроць 135 чалавек, гэта б азначала, што яны цалкам разьвіталіся з магчымасьцю неяк на сытуацыю паўплываць. Тое, што ўведзеныя санкцыі супроць 20 чалавек, азначае, што, магчыма, нейкія спадзяваньні на размову з Лукашэнкам захоўваюцца. Усё як на торжышчы: там лёсы палітвязьняў, тут лёсы тых, каго не пускаюць у Эўразьвяз. На жаль, сыстэма ўлады Лукашэнкі прывяла да таго, што людзьмі фактычна гандлююць».
Паводле Паўла Севярынца, найперш ад гэтага рашэньня выйграе Расея. Палітвязень нагадаў, што днямі прэзыдэнт Расеі Дзьмітрый Мядзьведзеў падтрымаў Аляксандра Лукашэнку ў ягоных спрэчках з Эўразьвязам, паабяцаўшы пэўную дапамогу, між тым як у палітычных кулюарах ішлі размовы пра перамовы беларускага рэжыму з Захадам:
«Заўсёды, як толькі зьявіцца хоць нейкая пэрспэктыва на дыялёг Беларусі з Эўропай, адразу ўзьнікае Расея са сваёй падтрымкай рэжыму, і ніякага збліжэньня не адбываецца».
Паводле агенцтва «Франс прэс», хто дакладна трапіў у сьпіс 21-го, стане вядома заўтра, 28 лютага. Назіральнікі мяркуюць, што ў сьпісе мусяць апынуцца чыноўнікі, датычныя да перасьледу кіраўніка праваабарончага цэнтру «Вясна» Алеся Бяляцкага, якога суд асудзіў на 4,5 года зьняволеньня паводле абвінавачаньня ва ўтойваньні вялікіх прыбыткаў. Жонка Бяляцкага Натальля Пінчук папрасіла час на тое, каб азнаёміцца са сьпісам:
«Усё ж такі я хачу азнаёміцца з гэтым сьпісам, усё прачытаць, асэнсаваць, а ўжо потым выказаць сваё меркаваньне».
«Мяркую, Эўропа мусіць, сказаўшы „а“, настойваць на сваёй пазыцыі. Бо тое, што адбываецца ў нашай краіне, ня толькі супярэчыць дэмакратычным і гуманітарным каштоўнасьцям, але становіцца з кожным днём усё больш цынічным, непрымальным. Гэтыя меры, канешне, мінімальныя з таго, што можа зрабіць Эўропа. Але і гэта ўсё ж дэманструе нязгоду зь дзеяньнямі, якія парушаюць нормы маралі і закону».
Што дае забарона на ўезд у краіны Эўропы людзям, якія працягваюць працу на дзяржаўнай службе? Марына Адамовіч мяркуе, што забарона мае вялікі маральны эфэкт на ўсё грамадзтва:
«Мяркуючы па камэнтарах спадарыні Ярмошынай адносна гэтых санкцыяў, нават на такіх прынцыповых апалягетаў рэжыму, якія называюць сябе людзьмі прэзыдэнта, гэта ўсё ж такі ўплывае».
«Сытуацыя з правамі чалавека ў Беларусі толькі пагаршаецца, і санкцыі трэба пашыраць. У новы сьпіс трапіў толькі 21 чалавек, гэтага мала. Трэба пашыраць сьпіс ня толькі за кошт выканаўцаў, а найперш за кошт тых, хто ёсьць мазгавым цэнтрам подласьцяў і пакасьцяў, якія чыняцца адносна змагароў за Беларусь».
Тры дні таму суд пакараў Сяргея Каваленку 2 гадамі і месяцам калёніі за парушэньне рэжыму адбыцьця пакараньня пасьля вывешваньня бел-чырвона-белага сьцяга на навагодняй ёлцы ў Віцебску.
