Лінкі ўнівэрсальнага доступу

Вэтэранам ня больш за пяць літраў малака ў адны рукі


У краме Магілёўскага дому вэтэранаў вывешана абвестка пра тое, што аблвыканкам раіць абмежаваць продаж некаторых відаў малочных прадуктаў.

Пакупнік можа набыць у адны рукі 5 літраў малака, па тры кефіру, сьмятаны, тварагу, масла ды 2 кіляграму сыру.

У адвестцы пазначана: «Згодна з пастановай упраўленьня гандлю й паслуг Магілёўскага аблвыканкаму ад 13 студзеня ўводзяцца часовыя меры продажу ў адны рукі...». Прыкладзены і сьпіс харчоў, набыць якія можна ў абмежаванай колькасьці.

Супрацоўніца ўнітарнага прадпрыемства «Дыета», якому належыць крама ў Доме вэтэранаў, паведаміла: «Там ніякая ні пастанова, а толькі рэкамэндацыя. Ніякіх абмежаваньняў для жыхароў Дома вэтэранаў ніхто ніколі не ўводзіў. Гэта для таго, каб проста не скупалі ў вялікай колькасьці прадукты. А так для вэтэранаў ніякіх абмежаваньняў няма. Мы наадварот робім для іх вялікія прэфэрэнцыі».

Раней адна з супрацоўніцаў управы гандлю аблвыканкаму казала «Свабодзе», што аблвыканкам ўвёў абмежавальныя рэкамэндацыі, каб не вывозілі харчы ў суседнюю Расею. Паводле афіцыйнай інфармацыі, ажыятаж на прадукты харчаваньня ў рэгіёне даўно зьнік.

6 лютага ўрад Беларусі скасаваў уведзеныя ўлетку 2011 году абмежаваньні на вываз за мяжы тавараў. Яны былі ўведзеныя для абароны ўнутранага спажывецкага рынка.

XS
SM
MD
LG