Лінкі ўнівэрсальнага доступу

Распараджэньнем Аляксандра Лукашэнкі ад студзеня падвышаныя пэнсійныя выплаты грамадзянам, якія дасягнулі 75- і 80-гадовага ўзросту. У лютым большасьць зь іх ужо атрымала новыя падвышаныя пэнсіі. Наколькі гэта вырашыла іхныя праблемы і як паўплывала на спажывецкі кошык пэнсіянэра?

Пэнсійнага веку наведнікі менскіх крамаў па-ранейшаму найчасьцей стаяць каля вітрынаў з малочнымі прадуктамі і хлебам.

Карэспандэнтка: «Вы ўжо атрымалі падвышаную пэнсію?»

Пэнсіянэрка: «Ну і што з той пэнсіі? Пэнсію паднялі — і цэны на прадукты павялічылі. А я хварэю, шмат грошай ідзе на лекі, і пэнсіі гэтай мне не хапае».

Карэспандэнтка: «Якія прадукты вы набываеце звычайна?»

Пэнсіянэрка: «Малочныя і што-небудзь з драбязы, і ўсё. Жыцьцё вельмі дарагое. Жыць нельга».

Іншая пэнсіянэрка: «Глядзіш, дзе таньней — то ў „Гіпа“, то ў „Эўра“. Ну, калі яшчэ дзеці дапамагаюць… А калі адзін, то за кватэру заплаціць… Нялёгка!»

Карэспандэнтка: «Падвышаная пэнсія ці палепшыла ваша становішча?»

«Усё роўна не хапае. Зойдзеш у краму — і ўвесь час новыя цэны. А калі ўсё гэта скончыцца? І гэтае падвышэньне — яно прыйшло і пайшло, а нават на хлеб і малако нейкія жудасныя кошты. І ні пра што добрае нават і ня думаеш. І проста недавер, увесь час думаеш: а што будзе далей?»

Значная частка пэнсіянэраў працягвае працаваць, як, да прыкладу, Генадзь Уладзімеравіч, які прыбірае сьнег каля крамы.

Генадзь Уладзімеравіч мусіць працягваць працаваць, бо пэнсіі на пражыцьцё не хапае

Генадзь Уладзімеравіч мусіць працягваць працаваць, бо пэнсіі на пражыцьцё не хапае


Карэспандэнтка: «Вы прыбіраеце сьнег, чаму — працуеце дадаткова?»

Генадзь Уладзімеравіч: «Так, а як жа!»

Карэспандэнтка: «Навошта?»

Генадзь Уладзімеравіч: «Не хапае. Жонка атрымлівае разам з новай надбаўкай 640 тысяч. Як яна можа пражыць, калі інвалід другой групы і ёй трэба шмат лекаў, а яны дарагія?»

Карэспандэнтка: «Ці палепшыць вашае становішча гэтае падвышэньне?»

Генадзь Уладзімеравіч: «Не, не нашмат: хлеб набыць, малако набыць, булачку якую простую, сьмятану — за 50 тысяч будзе. Гэта ня кажучы пра бульбу і іншае».

Анатоль Аляксандравіч сышоў з працы ў сталым веку толькі таму, што мусіць даглядаць жонку-інваліда. Ідучы з крамы, пакарміў галубоў.


Карэспандэнтка: «Вы толькі што кармілі галубоў. А вам як пэнсіянэру сёньня хапае вашай пэнсіі, каб пракарміцца?»

«Бачыце, калі краіна ў загоне, калі для іміджу аднаго чалавека будуюцца лядовыя палацы і гэтак далей, то пэнсіянэры з такой краіны на Канары ня езьдзяць, як гэта робяць нашы калегі ў суседніх краінах. Памятаеце фільм „Вясельле ў Малінаўцы?“ Калі ў „бацькі“ няма залатога запасу, то банда разьбягаецца, а пэнсіянэры — яны і застаюцца пэнсіянэрамі».
XS
SM
MD
LG