Лінкі ўнівэрсальнага доступу

За студзень беспрацоўных паболела на 8,5%


Цэнтар занятасьці ў Баранавічах

Цэнтар занятасьці ў Баранавічах

У Беларусі колькасьць беспрацоўных, зарэгістраваных у органах па працы, занятасьці і сацыяльнай абароне, на 1 лютага бягучага году склала 30,6 тыс. чалавек. Як паведамілі БЕЛТА у Нацыянальным статыстычным камітэце, гэта на 11,1% менш, чым год таму, і на 8,5% больш у параўнанні з 1 студзеня 2012 году.

Сярод рэгіёнаў краіны ў студзені больш за ўсё атрымалі статус беспрацоўных ў Гомельскай вобласці (2,9 тыс. чалавек), менш за ўсё ў Менску (1,2 тыс.). Усяго ж у краіне статус беспрацоўных быў прысвоены ў студзені 16,3 тыс. чалавек — 76,1% ад ліку тых, хто звярнуўся па дапамогу ў працаўладкаваньні.

Паводле статыстычных дадзеных, у агульнай колькасці зарэгістраваных беспрацоўных жанчыны складалі 51,8%, моладзь ва ўзросце да 30 гадоў — 38,4%, сельскія жыхары — 20,8%.

З-за адтоку кадраў за мяжу ў Беларусі ня ўзьнікне вялікіх праблем з беспрацоўем, мяркуе былы міністар працы, сацыёляг Аляксандар Сасноў.

«Ня думаю, што ў хуткім часе ў нас узьнікне праблема з беспрацоўем, нават калі пачнуць развальвацца МАЗы і БелАЗы. Народ проста будзе зьяжджаць з краіны», —заявіў ён.

Паводле экспэрта, адзін з «эўрапейскіх прадстаўнікоў» падзяліўся цікавай інфармацыяй, згодна зь якой у межах Эўразьвязу, паводле ацэнак экспэртаў ЭЗ, працуюць і жывуць каля 1 млн. 300 тыс. беларусаў. "На мой погляд, лічба крыху завышаная. Але, тым ня менш, пэрспэктыва росту адтоку кадраў ёсьць",— падкрэсьліў Сасноў.
XS
SM
MD
LG