Лінкі ўнівэрсальнага доступу

Першую дыктоўку на Гарадзеншчыне напісалі ў Бярозаўцы


Беларуская дыктоўка. Архіўнае фота

Беларуская дыктоўка. Архіўнае фота

У пятай агульнанацыянальнай дыктоўцы ў Бярозаўцы, што на Лідчыне, узялі ўдзел 12 чалавек. Для дыктоўкі быў абраны верш Максіма Танка «Родная мова».

Кіраўнік лідзкай гарадзкой арганізацыі Таварыства беларускай мовы імя Францішка Скарыны, Станіслаў Суднік, адзначыў, што дыктоўка адбылася, як і заўсёды, ва ўрачыстай атмасфэры. Яе пісалі ў гарадзкой бібліятэцы палацу культуры.

Паводле Судніка, для напісаньня дыктоўкі ТБМ рэкамэндавала два тэксты: Максіма Танка і Янкі Купалы. З нагоды таго, што сёлета спаўняецца 100 гадоў з дня нараджэньня Максіма Танка, і быў абраны ягоны верш «Родная мова». 19 лютага напісаньне дыктоўкі адбудзецца ў раённай бібліятэцы імя Янкі Купалы ў Лідзе.





Максім Танк. Родная мова


Зь легендаў i казак былых пакаленьняў,
З калосься цяжкога жытоў і пшанiц,
З сузор’яў i сонечных цёплых праменьняў,
З грымучага зьзяньня бурлiвых крынiц.
З птушынага шчэбету, шуму дубровы,
I з гора, i з радасьцi, i з усяго
Таго, што лягло назаўсёды ў аснову
Сьвятынi народа, бясьсьмерця яго, —
Ты выткана, дзiўная родная мова.

Няма на зямлi таго шчасьця i гора,
Якога б ты нам перадаць не магла.
Няма такiх нетраў, глыбокага мора
I гор, празь якiя б ты не правяла
Мяне на радзiму, туды, дзе сягоньня
Стаiць акрываўлены вораг зь пятлёй
Над спаленай хатай, над родным загонам,
Над будучыняй і над песьняй маёй, —
Над тым, што было і што век будзе вольным.

Народ пранясе цябе, родная мова,
Сьвятлом незгасальным у сэрцы сваiм
Празь цемру і горы змаганьняў суровых.
Калi ж ападзе і разьвеецца дым
I нiвы васкросшыя закаласяцца, —
Iзноў прашумiш ты вясновым дажджом,
Iзноў зазьвiнiш ты у кожнай у хаце,
Цымбалам дасi iх сярэбраны гром
I вусны расквецiш усьмешкай дзiцяцi.

Паказаць камэнтары

XS
SM
MD
LG